Միջին տարիքի ճաղատ տղամարդը նստած լսում է Զեմֆիրային, հայկական շանսոն և ժողովրդական երգեր, Ադելին, Ջոն Լենոնին, ֆրանսիական և ռուսական ռեփ, ԴԴՏ խմբին, Վիսոցկու գնչուական ռոմանսը։ Այս տեսանյութերում նա կկոցում է աչքերն արևի լույսի տակ, կապում է փողկապը, դեղին վարդը դնում բաճկոնի գրպանը կամ ինչ-որ բան գրում համակարգչով։ Բայց ամենից հաճախ նա ուղիղ նայում է առաջ՝ երբեմն ժպտալով, երբեմն մտախոհ, երբեմն տխուր։ Այս մարդը Հայաստանի վարչապետ Նիկոլ Փաշինյանն է։ Խորհրդարանական ընտրությունները տեղի կունենան 2026 թվականի հունիսին, և ընտրարշավի նախաշեմին քաղաքական գործիչը սկսել է փոխել իր հանրային կերպարը․ գրում է BBC-ի ռուսական ծառայությունը։
Այժմ հակառակորդների դեմ ուղղված քննադատություններին միացել են նաև տեսանյութերը, որտեղ նա լուռ երաժշտություն է լսում։
Այս ամենի շնորհիվ Հայաստանի հետ կապ չունեցող մարդիկ սկսել են հետևել Փաշինյանի Instagram-ի էջին։ Նրա՝ Աստանա կատարած այցի ժամանակ նկարահանված տեսանյութը, որն ուղեկցվում էր ղազախ երգչուհի Aua Rai-ի երգով, տեղական լրատվամիջոցներում գրեթե նույնքան լուսաբանում է ստացել, որքան այցի օրակարգը։
Ռուսաստան կատարած նրա ուղևորությունները նաև հնարավորություն են եղել ցուցադրելու իր չափազանց էկլեկտիկ երաժշտական ճաշակը։
Նոյեմբերին ռուս մարքեթոլոգ Եգոր Բոլկոնսկին պատմել է ամերիկացի PR մասնագետի զեկույցի մասին, որտեղ, իբր, նշվում էր, որ Նյու Յորքում գտնվող Edelman ընկերությունը, որն աշխարհի ամենամեծ PR գործակալություններից մեկն է, կանգնած է Փաշինյանի տարօրինակ տեսանյութերի հետևում։ Ընկերությունը կտրականապես հերքում է դա։
Փաշինյանի մամուլի քարտուղար Նազելի Բաղդասարյանը գործակալության հետ զրույցում նույնպես հերքել է ամերիկյան ընկերության ներգրավվածությունը։ «Վարչապետի սոցիալական մեդիա ռազմավարության մշակման գործում որևէ PR ընկերություն կամ խորհրդատու ներգրավված չէ։ Բոլոր համապատասխան աշխատանքները կատարում է վարչապետի աշխատակազմի մեդիա թիմը»,- հավելել է Բաղդասարյանը։
Գործակալությունը նշել է, որ ԼՂ-ում պատերազմից հետո Փաշինյանի խնդիրն է ընտրողների մոտ լավատեսություն ներշնչել։ Սոցիալական ցանցերը ծառայում են որպես դրա հիմնական հարթակ, և նա ունի եզակի փորձ այս հարցում։ 2018 թվականի բողոքի ցույցերը, որոնք նրան իշխանության բերեցին, կազմակերպվել էին Facebook-ի միջոցով։ Իշխանափոխությունից անմիջապես հետո շատերը կատակում էին, որ Հայաստանն այժմ կառավարվում է Facebook-ի միջոցով։
Սակայն Ղարաբաղյան երկրորդ պատերազմից հետո իշխանությունները դարձան ավելի փակ. ժամանակները նպաստավոր չէին սոցիալական ցանցերում վիրուսային բովանդակության համար։
Սակայն Փաշինյանի սգո շրջանն ավարտվեց, և սկսվեց ընտրարշավը: Իշխող կուսակցությունը հմտորեն օգտագործում է մեդիա ռեսուրսները և սոցիալական ցանցերը քաղաքական պայքարի համար։
Ըստ BBC-ի հետ զրուցած հայ մասնագետների՝ առայժմ Փաշինյանի տեսահոլովակներն ավելի մեծ ոգևորություն են առաջացնում նախկին խորհրդային այլ երկրների երիտասարդների շրջանում։ Հայաստանում վերաբերմունքը փոխելն ավելի դժվար է, քանի որ Փաշինյանի՝ 7 տարի իշխանության ղեկին լինելուց հետո մեծամասնությունն արդեն որոշում է կայացրել նրա վերաբերյալ։