Թուրքիայի նախագահ Ռեջեփ Թայիփ Էրդողանն Ադրբեջանի նախագահ Իլհամ Ալիևին ուղղված շնորհավորական նամակում բարձր է գնահատել տարածաշրջանում խաղաղ կարգավորումն առաջ մղելու Հայաստանի և Ադրբեջանի ջանքերը: Այս մասին հաղորդում են ադրբեջանական ԶԼՄ-ները:
Նշվում է, որ Ադրբեջանի նախագահի ծննդյան օրվա կապակցությամբ հղած ուղերձում Էրդողանն ընդգծել է, որ պատերազմի ավարտից հետո սկսված խաղաղ գործընթացը պետք է ավարտվի «կայուն համաձայնագրով», իսկ կողմերի ձեռք բերած արդյունքները հիմք են ստեղծում Հարավային Կովկասում երկարաժամկետ կայունության համար: Նրա խոսքով՝ տարածաշրջանում խաղաղությունն ու անվտանգությունը կնպաստեն Կովկասի բոլոր երկրների զարգացմանը։
Թուրքիայի նախագահը նաև ընդգծել է Ադրբեջանի ղեկավարության դերը միջազգային ասպարեզում երկրի դիրքերի ամրապնդման գործում և համոզմունք հայտնել, որ Բաքվի և Երևանի մասնակցությամբ խաղաղ կարգավորման հետագա քայլերը կարևոր ներդրում կլինեն տարածաշրջանային կայունության գործում:
Նամակում առանձին ընդգծվում է թուրք-ադրբեջանական հարաբերությունների ռազմավարական բնույթը՝ հիմնված «մեկ ազգ՝ երկու պետություն» սկզբունքի վրա, ինչպես նաև Անկարայի և Բաքվի պատրաստակամությունը՝ շարունակելու համատեղ նախագծերի իրականացումը, որոնք կորոշեն տարածաշրջանի ապագան:
2025 թվականի նոյեմբերի սկզբին տասնյակ տարիների ընթացքում առաջին անգամ Ադրբեջանի տարածքով նոր երկաթուղային երթուղով Հայաստան էին ուղարկվել ռուսական հացահատիկի խոշոր մատակարարումներ։ Ռուսաստանը նախատեսում է մինչև 2026 թվականի հունվարի վերջը մոտ 132 վագոն ցորեն հասցնել: Նույն երթուղով Երևան են բերվել նաև ղազախական ցորենի խմբաքանակներ:
