ՀԱԿ կուսակցությունն ու «Մեր ձևով» շարժումը միավորվելու շուրջ պայմանավորվածություն չունեն, հայտնել է «Հրապարակ» օրաթերթը՝ հղում անելով իր աղբյուրին։
Ըստ թերթի՝ «Միասնության թևեր» շարժման նախաձեռնող Արման Թաթոյանի հետ համագործակցության էջը ՀԱԿ-ի համար նույնպես փակված է, քանի որ ասուլիսում նրա արած հայտարարությունից, թե ՀՀ վարչապետ Նիկոլ Փաշինյանին հեռացնելու միակ ճանապարհը նախկին նախագահների չառաջադրվելն է, վիրավորվել են։
Ամիսներ առաջ էլ ՀԱԿ-ի, Թաթոյանի, ԼՀԿ-ի, Սուրեն Սուրենյանցի, «Ապրելու երկրի» և Վիկտոր Մնացականյանի միջև էին կոնսուլտացիաներ ընթանում` միավորման օրակարգով, նշել է լրատվականը։ Թերթի տեղեկությամբ՝ Սուրենյանցը Գագիկ Ծառուկյանի առաջնորդած ճակատում կլինի, իսկ մյուս ուժերի հարցում դեռ անորոշություն է։
