2026 թվականի հունվարի 1-ից Հայաստանում ներդրվում է Առողջության համապարփակ ապահովագրության համակարգը, ինչի արդյունքում աշխատավարձից կատարվող պահումների կառուցվածքը փոխվում է։ Զուգահեռաբար վերանայվել են նաև դրոշմանիշային վճարի դրույքաչափերը։ How2B-ի թարմացված հաշվիչը հաշվի է առնում այս բոլոր փոփոխությունները՝ օգնելով Ձեզ ճշգրիտ հաշվարկել, թե որքան կկազմի Ձեր մաքուր եկամուտը նոր համակարգով։
Մուտքագրե՛ք «մաքուր» աշխատավարձը և մեր հաշվիչը նույն վայրկյանին ցույց կտա ձեր «գրանցված» (կեղտոտ) աշխատավարձը (և հակառակը), եկամտային հարկը, սոցիալական և դրոշմանիշային վճարները։
Աշխատավարձի հաշվիչը թարմացված է՝ համաձայն 2026 թվականի հունվարի 1-ից հետո գործող օրենսդրության։
Համեմատելու համար կարող եք հաշվել աշխատավարձը 2021, 2022, մինչև 2023 թվականի հուլիսի 1-ի, և 2024-25թթ․ հաշվարկներով։
Ինչպե՞ս է աշխատում աշխատավարձի հաշվիչը
2026 թվականին մաքուր աշխատավարձը ստանալու համար պետք է գրանցված աշխատավարձից հանել եկամտային հարկը, սոց․ վճարը, դրոշմանիշային վճարը, և առողջության ապահովագրության ամսական վճարը։
Պետք է հաշվի առնել․
- Արդյո՞ք աշխատողը մասնակցում է պարտադիր կուտակային կենսաթոշակային համակարգին:
- Արդյո՞ք աշխատողը օգտվում է գիտական հետազոտությունների ու փորձարարական մշակումների համար տրվող հարկային արտոնությունից
Մեր աշխատավարձի հաշվիչը հնարավորություն է տալիս նշել բոլոր տարբերակները՝ արդյունքում ստանալով ճշգրիտ արդյունք։
Եկամտային հարկի հաշվարկը 2026թ․-ին
Եկամտային հարկի դրույքաչափը կազմում է 20%, որը հաշվարկվում է կեղտոտ աշխատավարձից։
Եկամտային հարկի այլ՝ 10% դրույքաչափ է գործում միայն գիտական հետազոտությունների ու փորձարարական մշակումների համար տրվող հարկային արտոնությունից օգտվող աշխատողների համար։
Պարտադիր կուտակային կենսաթոշակային վճար
Պարտադիր կուտակային կենսաթոշակային համակարգին պարտադիր մասնակցություն պետք է ունենան այն մարդիկ, որոնք ծնվել են 1974 թվականին և դրանից հետո, իսկ կամավոր մասնակցություն՝ մինչև 1974 թվականի ծնվածները։
Պարտադիր կուտակային կենսաթոշակային կամ սոցիալական վճարները հաշվարկվում են ամսական մինչև 1.125.000 դրամ եկամտից (նվազագույն՝ 75.000 դրամ աշխատավարձի 15-պատիկ): Աշխատավարձի հաշվիչը թարմացված է նշված փոփոխությամբ։
Սոցիալական վճարի դրույքաչափը կազմում է․
- մինչև 500․000 աշխատավարձի դեպքում՝ 5%,
- 500․000 դրամից ավելի դեպքում՝ Աշխատավարձի 10% — 25.000 դրամ:
- 1.125.000-ից ավելի ստացողների համար՝ 87․500 դրամ կամ որ նույնն է՝ (1.125.000 x 10%) — 25.000 դրամ։
Աշխատավարձի հաշվիչից օգտվելիս նշեք՝ արդյոք մասնակցում եք պարտադիր կուտակային կենսաթոշակային համակարգին։
Դրոշմանիշային վճարի դրույքաչափերը
Զինծառայողների ապահովագրության հիմնադրամի դրոշմանիշային վճարները 2026թ․ հունվարի 1-ից գանձվում են հետևյալ սանդղակով.
| Մինչև 1 000 000 դրամ հաշվարկման բազայի դեպքում | 1000 դրամ |
| 1 000 001 դրամ և ավելի հաշվարկման բազայի դեպքում | 15 000 դրամ |
Նախորդ տարվա համեմատ՝ մինչև 1.000.000 դրամ աշխատավարձ ստացող քաղաքացիների համար դրոշմանիշային վճարի դրույքաչափը նվազել է՝ տարբեր խմբերի համար տարբեր չափերով, սակայն նվազած գումարը հիմնականում ուղղվելու է նոր ներդրվող առողջության համապարփակ ապահովագրության վճարի փոխհատուցմանը։
Առողջության համապարփակ ապահովագրության վճարներ
2026թ․ հունվարի մեկից ուժի մեջ է մտնում առողջության համապարփակ ապահովագրության համակարգը, որին մասնակցելու են 200.000 դրամ և ավել աշխատավարձ ստացող աշխատողները։
Ամսական ապահովագրավճարի չափը կազմելու է ամսական 10800 դրամ, տարեկան՝ 129600 դրամ։
Սակայն, ինչպես ավելի վերևում նշել ենք, ապահովագրավճարի մի մասը փոխհատուցվելու է դրոշմանիշային վճարի նվազման հաշվին, մասնավորապես՝
- մինչև 100.000 դրամ կեղտոտ աշխատավարձ ստացող աշխատողների դրոշմանիշային վճարը 1500 դրամից նվազում է 1000 դրամի, ինչի արդյունքում աշխատողի ամսական մաքուր եկամուտը աճում է 500 դրամով: Նշված խումբը դեռևս չի մասնացելու առողջության ապահովագրության համակարգին։
- 100.001-ից մինչև 200.000 դրամ կեղտոտ աշխատավարձ ստացող աշխատողների դրոշմանիշային վճարը 3000 դրամից նվազում է 1000 դրամի, ինչի արդյունքում աշխատողի ամսական մաքուր եկամուտը աճում է 2000 դրամով։ Նշված խումբը դեռևս չի մասնացելու առողջության ապահովագրության համակարգին։
- 200.001-ից մինչև 500.000 դրամ կեղտոտ աշխատավարձ ստացող աշխատողների դրոշմանիշային վճարը 5500 դրամից նվազում է 1000 դրամի, ինչի արդյունքում տարբերությունը՝ 4500 դրամը, ուղղվում է առողջության ապահովագրավճարին։ Տվյալ խմբի համար ապահովագրավճարից ամսական 6000 դրամը վճարվում է պետական բյուջեից, և աշխատողը պետք է ամսական վճարի 300 դրամ տարբերությունը։
- 500.001-ից մինչև 1.000.000 դրամ կեղտոտ աշխատավարձ ստացող աշխատողների դրոշմանիշային վճարը 8500 դրամից նվազում է 1000 դրամի, ինչի արդյունքում տարբերությունը՝ 7500 դրամը, ուղղվում է առողջության ապահովագրավճարին։ Առողջության ապահովագրավճարի համար աշխատողը պետք է ամսական վճարի 3300 դրամ տարբերությունը։
- 1.000.001 դրամ և ավել կեղտոտ աշխատավարձ ստացող աշխատողների դրոշմանիշային վճարը չի փոխվում, մնում է 15.000 դրամ, և աշխատողն իր առողջության ապահովագրավճարի ամբողջ գումարը՝ ամսական 10.800 դրամը պետք է լրացուցիչ վճարի։
Է՞լ ինչ կարդալ՝