Ավստրալացի մի տղամարդ ստիպել է տեղական իշխանություններին հետաձգել ավելի քան 1000 հեկտար էնդեմիկ անտառի վերահսկվող այրման ծրագրերը և որպես բողոքի նշան մեկ շաբաթ ապրել է ծառի վրա, հաղորդում է ABC-ն։
Ըստ նրա տեղեկությունների՝ Արևմտյան Ավստրալիա նահանգի 70-ամյա բնակիչը վեց գիշեր է անցկացրել ծառերից մեկի սաղարթում՝ 20 մետր բարձրության վրա գտնվող հարթակի վրա, քանի որ իշխանությունները ծրագրել էին ոչնչացնել մոտ 500 հեկտար անտառ, որտեղ աճում է էվկալիպտի էնդեմիկ տեսակ։ Տղամարդն սկսել է իր բողոքի ակցիան այն բանից հետո, երբ բանվորներն անցել են նախապատրաստական աշխատանքների։ Ավստրալացու գործողությունները ստիպել են տեղական իշխանություններին հետաձգել ծառերի այրումը այս և երկու այլ տեղամասերում՝ ավելի քան 1000 հեկտար ընդհանուր տարածքով։
«Ուրիշ ոչինչ չօգնեց։ Այս տեղամասի այրումն անխուսափելի էր, նրանք արդեն ամեն ինչ մաքրել էին և պատրաստ էին սկսել։ Մենք պետք է ինչ-որ բան անեինք», – ABC-ն մեջբերում է ակտիվիստի մեկնաբանությունը։
Ակտիվիստը նշել է, որ գոհ է ակցիայի արդյունքից, չնայած այն բանին, որ այրումը միայն հետաձգվել է, այլ ոչ թե չեղարկվել։ Նա համոզված է, որ շահած ժամանակը թույլ կտա շարունակել երկխոսությունը իշխանությունների հետ։ Նրա կողմնակիցները մտադիր են նոր բողոքի ակցիաներ կազմակերպել այնքան ժամանակ, քանի դեռ էնդեմիկ տեսակը վերջնականապես չի հանվել ոչնչացման ենթակա ցանկից։
Ըստ հեռուստաընկերության տվյալների՝ այս տեսակը էվկալիպտների ամենախոշոր ներկայացուցիչն է աշխարհում։ Այն աճում է միայն Արևմտյան Ավստրալիայում։ Ծառերը կարող են ապրել մինչև 500 տարի և հասնել 80 մետր բարձրության։ Դրանք ընդգրկված են անտառային հրդեհների կանխարգելման նպատակով իրականացվող վերահսկվող ոչնչացման ծրագրում և նախկինում ևս եղել են իշխանությունների ու տեղի բնակիչների միջև վեճերի առարկա։