19 դեկտեմբերի 2025 – 16:24 AMT
PanARMENIAN.Net – Ազգային ժողովի նախագահ Ալեն Սիմոնյանն Ամանորի և Սուրբ Ծննդյան տոների առիթով պարգևատրել է ԱԺ պատգամավորներին ու անձնակազմին, հայտնում է ԱԺ մամուլի ծառայությունը։
Ըստ հրապարակված կարգադրության՝ նրանք խրախուսվել են միանվագ դրամական պարգևներով։ Պարգևավճարների չափը հայտնի չէ։
«Ղեկավարվելով «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 12-րդ և 22-րդ կետերով՝ կարգադրում եմ. Ամանորի և Սուրբ Ծննդյան տոների առթիվ Ազգային ժողովի պատգամավորներին, Ազգային ժողովի աշխատակազմի պետական ծառայողներին և աշխատողներին խրախուսել միանվագ դրամական պարգևատրմամբ՝ համաձայն հավելվածների:
Ազգային ժողովի աշխատակազմի ղեկավար-գլխավոր քարտուղար Դ. Առաքելյանին՝ Հայաստանի Հանրապետության օրենսդրությամբ սահմանված կարգով ապահովել համապատասխան վճարումների կատարումը», – ասվում է փաստաթղթում։
Սիմոնյանի մեկ այլ որոշմամբ ևս պատգամավորներն ու աշխատակիցները պարգևատրվել են միանվագ դրամական վճարումներով։
Այս պարգևավճարների չափը նույնպես հայտնի չէ։