ԵԿԲ-ն դեկտեմբերի նիստի արդյունքներով չի փոխել իր երեք հիմնական տոկոսադրույքները։
Կարգավորիչի հաղորդագրության համաձայն՝ ավանդների տոկոսադրույքը պահպանվել է տարեկան 2% մակարդակում, հիմնական վերաֆինանսավորման գործառնությունների տոկոսադրույքը՝ 2.15%, իսկ մարժինալը՝ 2.4%։
Որոշումը համընկել է վերլուծաբանների և շուկայի մասնակիցների սպասումների հետ։
Տոկոսադրույքներն այս մակարդակներում պահպանվում են հուլիսից ի վեր։
ԵԿԲ-ն շարունակում է ակնկալել, որ միջնաժամկետ հեռանկարում գնաճը եվրագոտում կկայունանա 2% մակարդակում։
Տոկոսադրույքների փոփոխման կամ պահպանման վերաբերյալ որոշումները հիմնված կլինեն գնաճի կանխատեսումների և դրանց հետ կապված ռիսկերի վրա։ ԵԿԲ-ն պատրաստ է անհրաժեշտության դեպքում ճշգրտել իր բոլոր գործիքները՝ գնաճը նպատակային մակարդակում կայունացնելու համար։
Մամուլի հաղորդագրությունում նշվում է, որ ակտիվների գնման ծրագրերի՝ PEPP և APP շրջանակում ԵԿԲ-ի կողմից ձեռք բերված արժեթղթերի պորտֆելը կրճատվում է չափավոր և կանխատեսելի տեմպերով, քանի որ կարգավորիչը այլևս չի վերաներդնում մարման ենթակա արժեթղթերից ստացվող միջոցները: