Iravaban.net-ը ուսումնասիրել է Իրավական ակտերի նախագծերի հրապարակման e-draft.am կայքում հանրային քննարկման դրված «Հայաստանի Հանրապետության կառավարության 2010 թվականի ապրիլի 8-ի N 439-ն որոշման մեջ փոփոխություն կատարելու մասին» ՀՀ կառավարության որոշման նախագիծը։
Նախագծով սահմանվում է հանրակրթության պետական չափորոշչի ձևավորման և հաստատման նոր կարգ, ինչպես նաև հաստատվում է հանրակրթության պետական նոր չափորոշիչը՝ համապատասխան հավելվածներով։
Ե՞րբ է ուժի մեջ մտնելու որոշումը
Առաջարկվող որոշմամբ նախատեսվում է, որ այն ուժի մեջ կմտնի պաշտոնական հրապարակմանը հաջորդող օրվանից։
Ի՞նչ է կարգավորվում նոր կարգով
Նոր կարգով կանոնակարգվում են՝
- հանրակրթության պետական չափորոշչի,
- առարկայական չափորոշիչների և ծրագրերի ձևավորման, հաստատման և հանրակրթական համակարգում ներդրման գործընթացները։
Սահմանվում է, որ հանրակրթության պետական չափորոշիչը բաղկացած է մի շարք հիմնարար բաղադրիչներից՝ ուսումնական բնագավառներ, ուսումնական պլանի կառուցվածք, սովորողների գնահատման սկզբունքներ, ինչպես նաև շրջանավարտներին ներկայացվող կարողունակություններն ու ուսումնառության ակնկալվող վերջնարդյունքները՝ ըստ կրթական աստիճանների։
Ո՞վ է մշակում և հաստատում չափորոշիչը
Չափորոշիչը մշակվում է ՀՀ կրթության պետական կառավարման լիազոր մարմնի կողմից։ Այդ նպատակով ձևավորվում է հանձնաժողով, որը ներգրավում է մասնագիտական աշխատանքային խմբեր՝ առանձին բաղադրիչների և առարկայական չափորոշիչների մշակման համար։
Հանրակրթության պետական չափորոշիչը հաստատվում է ՀՀ կառավարության կողմից, իսկ առարկայական ծրագրերն ու չափորոշիչները՝ լիազոր մարմնի կողմից։
Նախագծով նաև նախատեսվում է, որ չափորոշիչը կարող է վերանայվել՝ առնվազն 4 տարին մեկ անգամ իրականացված վերլուծությունների արդյունքների հիման վրա։
Ինչի՞ն է ուղղված հանրակրթության պետական չափորոշիչը
Նոր չափորոշիչը սահմանում է միջնակարգ կրթության շրջանավարտին ներկայացվող որակական պահանջները՝ կարողունակությունների (կոմպետենցիաների) տեսքով, ինչպես նաև՝
- ուսումնառության ակնկալվող վերջնարդյունքները,
- սովորողի ուսումնական բեռնվածության նվազագույն և առավելագույն ծավալները,
- ուսումնական պլանների և առարկայացանկերի ձևավորման սկզբունքները,
- գնահատման տեսակներն ու սանդղակները։
Չափորոշիչը նպատակաուղղված է ներառական, հավասարապես որակյալ և հասանելի կրթության քաղաքականության ապահովմանը և պարտադիր է բոլոր հանրակրթական ծրագրեր իրականացնող ուսումնական հաստատությունների համար՝ անկախ ենթակայությունից և կազմակերպական-իրավական ձևից։
Շեշտադրում՝ կարողունակությունների վրա
Նախագծով ամրագրվում է, որ կրթական գործընթացի առանցքում դրվում են սովորողի կարողունակությունները, այդ թվում՝
- լեզվական և հաղորդակցական,
- սովորել սովորելու,
- ինքնաճանաչողական և սոցիալական,
- ժողովրդավարական մշակույթի,
- թվային և մեդիա,
- մշակութային,
- մաթեմատիկական և գիտատեխնիկական,
- տնտեսական կարողունակությունները։
Այս կարողունակությունները պետք է ձևավորվեն կրթական բոլոր աստիճաններում՝ տարրականից մինչև միջնակարգ։
Ի՞նչ փոփոխություններ են նախատեսվում ուսումնական պլաններում
Նախագիծը մանրամասն կարգավորում է ուսումնական պլանի կառուցվածքը՝ սահմանելով պետական, դպրոցական և անհատական (ընտրովի) բաղադրիչները, ինչպես նաև ուսումնական ժամաքանակների նվազագույն և առավելագույն շեմերը յուրաքանչյուր կրթական աստիճանի համար։
Սահմանվում է նաև ուսումնական նախագծերի պարտադիր իրականացում՝ սկսած 7-րդ դասարանից, ինչպես նաև նպատակային ծրագրերի ներդրում միջնակարգ կրթության երրորդ աստիճանում։
Ի՞նչ է սպասվում արդյունքում
Կառավարության նախաձեռնության նպատակն է՝
- ապահովել կրթության բովանդակության համակարգված և շարունակական զարգացում,
- ուժեղացնել կարողունակությունների վրա հիմնված կրթական մոտեցումը,
- բարձրացնել հանրակրթության որակն ու համապատասխանությունը ժամանակակից պահանջներին,
- ապահովել ներառական և հավասար հնարավորություններով կրթական միջավայր։