Իսպանիայի հավաքականի և կատալոնական «Բարսելոնայի» կիսապաշտպան Այտանա Բոնմատին երրորդ տարին անընդմեջ ճանաչվել է ՖԻՖԱ-ի կանանց լավագույն ֆուտբոլիստ:
Չնայած այն հանգամանքին, որ թե՛ «Բարսելոնան» (Չեմպիոնների լիգայում), թե՛ Իսպանիայի հավաքականը (Եվրո-2025-ում) պարտություն կրեցին եզրափակիչներում, Բոնմատին երկու մրցաշարերում էլ ճանաչվեց լավագույն խաղացող (MVP): Նրա ոգեշնչող խաղի շնորհիվ «Բարսելոնան» նվաճեց Իսպանիայի ներքին բոլոր տիտղոսները:
Ցավոք, ժամանակակից ֆուտբոլի 27-ամյա աստղը դեկտեմբերի սկզբին ստիպված էր ենթարկվել վիրահատության՝ սրունքի ոսկորի կոտրվածքի պատճառով:
Հիմնական նվաճումները
- Իսպանիայի չեմպիոն (Liga F) 2024/25
- Իսպանիայի սուպերգավաթակիր (2024/25)
- ՈՒԵՖԱ-ի կանանց Եվրո-2025-ի փոխչեմպիոն և մրցաշարի լավագույն խաղացող
- Կանանց Չեմպիոնների լիգայի 2024/25 մրցաշրջանի փոխչեմպիոն և լավագույն խաղացող
- Կանանց Չեմպիոնների լիգայի լավագույն ասիստենտ
Հաղթողը որոշվել է քվեարկության արդյունքում, որին մասնակցել են կանանց ազգային հավաքականների գլխավոր մարզիչները, ավագները, լրագրողները և երկրպագուները (ՖԻՖԱ-ի պաշտոնական կայքում): Յուրաքանչյուր խմբի ձայները կազմել են ընդհանուր արդյունքի 25%-ը: Հաշվի են առնվել ֆուտբոլիստուհիների ելույթները 2024 թ. օգոստոսի 11-ից մինչև 2025 թ. օգոստոսի 2-ն ընկած ժամանակահատվածում: