ԵՐԵՎԱՆ, 16 դեկտեմբերի․/ԱՌԿԱ/․ Ընթացիկ կորպորատիվ պարտատոմսերի շուկայական ծավալը կազմում է $1.7 մլրդ։ Եվ հաշվի առնելով այն փաստը, որ 7-8 տարի առաջ այդ թվերը կազմում էին մոտավորապես $300-400 մլն, հետաքրքրության աճ է նկատվում հենց այս ուղղությամբ։ Այս մասին հայտարարել է Freedom Broker Armenia–ի տնօրեն Հովակ Հովակիմյանը «ԱՌԿԱ» գործակալությանը տված հարցազրույցում։
Նրա խոսքով, 2025 թվականին հաճախորդների համար առանցքային հետաքրքրությունը կենտրոնացած էր ֆիքսված եկամտաբերությամբ գործիքների՝ կորպորատիվ և պետական պարտատոմսերի վրա։
«Ընդհանուր առմամբ, 2025 թվականին կորպորատիվ և պետական պարտատոմսերի թողարկումների ծավալի զգալի աճ է գրանցվել։ Պետական պարտատոմսերը, ինչպես միշտ, ֆիքսված եկամտաբերությամբ ամենապահանջված գործիքն են եղել։ Եվ այս տարի կատարված բոլոր թողարկումներով պահանջարկը 20-40%-ով գերազանցել է առաջարկը։ Այսինքն՝ մանրածախ, և առավել ևս ինստիտուցիոնալ ներդրողները՝ բանկերը, ներդրումային ընկերությունները, վարկային կազմակերպությունները, ապահովագրական ընկերությունները, սկսել են հետաքրքրություն ցուցաբերել», – պարզաբանել է նա։
Հովակիմյանը նշել է, որ կենսաթոշակային ֆոնդերի համատեքստում լուրջ ցատկ է նկատվում կորպորատիվ պարտատոմսերում նրանց մասնակցության մեջ։
«Քանի որ Հայաստանում այս շուկան աճում է, կենսաթոշակային ֆոնդերի մոտ նոր գործիքների, և, համապատասխանաբար, պորտֆելի դիվերսիֆիկացիայի հնարավորություն է առաջանում, ինչը կարևոր է նրանց համար», – ասել է նա։
Freedom Broker Armenia–ի տնօրենը նշել է նաև, որ հետաքրքրություն կա նաև հայկական շուկայի համար ավելի քիչ ավանդական գործիքների նկատմամբ, ինչպիսին է մասնաբաժնային մասնակցությունը, երբ ներդրողը դառնում է բիզնեսի սեփականատեր։
«Հայաստանի մասնավոր ներդրողների միտումներով, այդ գործիքները նույնպես պահանջարկ ունեն, թեև ոչ այն ծավալով, ինչ ֆիքսված եկամտաբերությամբ գործիքները», – ավելացրել է նա։
Ըստ AMX-ի տվյալների, նոյեմբերին AMX-ի առաջնային հարթակում պետական պարտատոմսերի տեղաբաշխման աճուրդների ընդհանուր ծավալը կազմել է մոտ 43.4 մլրդ դրամ։ Երկրորդային շուկայում իրականացվել է 86 գործարք՝ ավելի քան 28.2 մլրդ դրամ ծավալով, ինչը 109%-ով գերազանցում է նախորդ տարվա նույն ցուցանիշը։
Կորպորատիվ պարտատոմսերի շուկայում առևտրի ծավալը, նախորդ տարվա նույն ժամանակահատվածի նկատմամբ, աճել է 26%-ով՝ կազմելով ավելի քան 11.7 մլրդ դրամ։ Հաշվետու ժամանակահատվածում կնքվել է 1159 գործարք՝ նոյեմբերի վերջի դրությամբ բորսայում շրջանառվող 165 կորպորատիվ պարտատոմսերով։
Ամբողջական հարցազրույցին կարելի է ծանոթանալ հետևյալ հղումով։