Ամերիկացի պաշտօնատար մը իսրայէլեան «Ճերուզալեմ փոսթ» օրաթերթին յայտնած է, թէ կայունութեան միջազգային ուժը Կազայի մէջ պիտի տեղակայուի 2026 թուականի սկիզբը:
Ան յայտնած է, որ նշեալ ուժը առաջին փուլին բաղկացած պիտի ըլլայ մէկ կամ երկու պետութիւններու զինուորներէ, իսկ այլ պետութիւնները կրնան հետագային անոնց միանալ:
«Ուժը պիտի չտեղակայուի Կազայի մէջ Համասի վերահսկողութեան տակ գտնուող շրջաններուն մէջ», աւելցուցած է ան:
Ամերիկացի պատուիրակը միջազգային ուժին մասնակից երկիրները չէ նշած, սակայն ապահովական աղբիւրներ, նախքան այդ, հաղորդած են, որ Անգարան պատրաստ է իր ուժերը ուղարկելու:
«Կայունութեան միջազգային ուժին միանալու համար Կազա զօրքեր ուղարկելու վերաբերեալ խնդիր չունինք: Ամերիկացիները մեծապէս կ՛ուզեն, որ այդտեղ ըլլանք, սակայն Իսրայէլ դէմ է: Ամերիկացիները Իսրայէլի վրայ ճնշում կը բանեցնեն, որպէսզի կայունութեան միջազգային ուժին թրքական ուժերու մասնակցութեան համաձայնի», յայտնած են աղբիւրները: