Վարչապետ Նաուաֆ Սալամ բրիտանական «Ֆայնենշըլ Թայմզ» օրաթերթին մէջ լոյս տեսած իր յօդուածին մէջ յայտնեց. «Լիբանանի պատմութիւնը պէտք չէ քայքայմամբ աւարտի: Մեր ապագան պէտք է կառավարէ ուժեղ եւ արդիական պետութիւն մը, որ կ՛աջակցի աշխատանքի ու նորարարութեան նախաձեռնողական ոգիին, եւ յարատեւութեան, որով երկար ատենէ ի վեր ծանօթ են լիբանանցիները: Ուստի մեր կառավարութիւնը կը պնդէ ազգային նոր մեկնարկի մը վրայ, որ հիմնուած է երկու հիմերու վրայ` գերիշխանութեան եւ բարեկարգումին:
«Առաջին հիմքը, այսինքն` գերիշխանութիւնը վճռորոշ հարց է: Մենք կտրուկ կերպով կը կառչինք այն գաղափարին, որ միայն լիբանանեան պետութիւնը կրնայ իր հողերուն վրայ զէնք ունենալ, եւ լիբանանեան պետութիւնը առանձինը պատերազմի եւ խաղաղութեան վերաբերեալ որոշումներ տալու իշխանութիւնն ունի»:
«Միջազգային ընտանիքը պէտք է Իսրայէլի վրայ ճնշում բանեցնէ, որպէսզի դադրեցնէ իր թշնամական արարքները եւ ամբողջովին հեռանայ Լիբանանէն: Միջազգային ընտանիքը նաեւ պէտք է ամրապնդէ լիբանանեան զինեալ ուժերուն տրամադրուող աջակցութիւնը, որովհետեւ անիկա երկրին մէջ կայունութիւնը երաշխաւորելու ամէնէն կարող հաստատութիւնն է», գրեց ան:
«Լիբանան աւելի լայն շրջանի կայունութեան համար կարեւոր է: Մենք մեր եղբայրներէն ու միջազգային գործընկերներէն չենք խնդրեր, որ մեր աշխատանքը մեր տեղ ընեն, այլ մեր կողքին կանգնին եւ մեզի յաջողելու օգնեն», նշեց վարչապետը: