25 տարեկան յունահռոմէական ըմբիշ Մալխաս Ամոյեան (77 քկ) ներառուած է «2025 թուականի ամէնէն գերիշխան ըմբիշ», տիտղոսի թեկնածուներու ցանկին մէջ, կը նշէ Աշխարհի ըմբշամարտի միացեալ ֆետերասիոնը:
Մալխաս Ամոյեանի թեկնածութիւնը շատ տրամաբանական է անոր փայլուն տարուան համար, մանաւանդ որ ան աւարտեց առանց որեւէ պարտութեան:
Վերջին անգամ 2024-ի Փարիզի Ողիմպիականի խաղերուն, ուր ան պրոնզէ մետալ նուաճած էր, կիսաւարտականին պարտութիւն կրած էր ճափոնցի Նաօ Քուսաքայէն (որ աւելի ուշ ոսկի մետալ շահեցաւ):
2025-ին Ամոյեան նուաճեց Եւրոպայի ախոյեանութիւնը, Լեհաստանի բաց մրցաշարքի եւ աշխարհի ախոյեանութեան ոսկի մետալները` ցուցաբերելով տպաւորիչ գերազանց ելոյթներ:
Յունահռոմէական պայքարի թեկնածուներն են Մալխաս Ամոյեան (77 քկ), Մոհամետհատի Սարաֆի (97 քկ, Իրան), Սայիտ Էսմայիլի (Իրան, 67 քկ), Ղոլամրեզա Ֆարոխի (Իրան, 82 քկ) եւ Այտժան Խալմախանով (Ուզպեքիստան, 63 քկ):