«Բարսելոնան» կարող է ձմեռային տրանսֆերային պատուհանի ընթացքում նոր պաշտպան ձեռք բերել, եթե Ռոնալդ Արաուխոն չկարողանա կարգավորել իր հոգեբանական խնդիրները։ Այս մասին հայտնում է Marca-ն։
Աղբյուրի փոխանցմամբ՝ կատալոնական ակումբը ի սկզբանե չէր դիտարկում հունվարին նոր ֆուտբոլիստի տրանսֆերի տարբերակը, սակայն ուրուգվայցի պաշտպանի շուրջ ստեղծված իրավիճակը ստիպել է փոխել դիրքորոշումը։
Նշվում է, որ այս շաբաթվա սկզբին Արաուխոն «Բարսելոնայից» անորոշ ժամանակ է խնդրել՝ հոգեբանական հավասարակշռությունը վերականգնելու համար։
Նրա վիճակը զգալիորեն վատթարացել է Չեմպիոնների լիգայի շրջանակում կայացած «Չելսիի» դեմ հանդիպումից հետո, որտեղ պաշտպանը 44-րդ րոպեին կարմիր քարտ էր ստացել, իսկ «կապտանռնագույնները» պարտվել էին 0:3 հաշվով։