Աշխատանքի և սոցիալական հարցերի նախարարի տեղակալ Դավիթ Խաչատրյանը հանդիպում է ունեցել Աշխատանքի միջազգային կազմակերպության (ԱՄԿ) ներկայացուցիչների հետ՝ քննարկելու Հայաստանում ոչ ֆորմալ զբաղվածության կանխարգելման ուղղությամբ իրականացվող քայլերը։ Նախարարի տեղակալը շնորհակալություն է հայտնել «Հայաստանում ֆորմալ զբաղվածության խթանումը» թեմայով աշխատաժողովի կազմակերպման և ոչ ֆորմալ տնտեսության վերաբերյալ կատարված ուսումնասիրության համար։
ԱՄԿ Գլոբալ ծրագրի տնօրեն Ֆրեդերիկ Լապեյրին նշել է, որ ուսումնասիրության արդյունքները կծառայեն ապագա օրենսդրական բարեփոխումների քննարկման հիմք, ընդգծելով, որ ոչ ֆորմալ զբաղվածության հիմնական բաժինը կենտրոնացած է գյուղատնտեսության և շինարարության ոլորտներում։ Կարևորվել է նաև միգրանտ աշխատողների իրավունքների պաշտպանությունը։
Դավիթ Խաչատրյանը ներկայացրել է զբաղվածության և ժողովրդագրության ռազմավարությունների, ինչպես նաև տեղահանվածների համար իրականացվող և մշակվող ծրագրերի ընթացքը՝ կարևորելով ԱՄԿ աջակցությունն ու հետագա համագործակցությունը։
Կողմերը վերահաստատել են համատեղ աշխատանքը շարունակելու պատրաստակամությունը։