ԱՄՆ ֆինանսների նախարարությունը տրամադրել է ընդհանուր լիցենզիա, որը թույլ է տալիս «Լուկոյլ» ընկերությանը շարունակել իր բենզալցակայանների շահագործումը Ռուսաստանից դուրս։ Հինգշաբթի՝ դեկտեմբերի 4-ին, ԱՄՆ նախարարությունը կասեցրել է ռուսական նավթային ընկերության նկատմամբ կիրառվող պատժամիջոցների մի մասը։
ԱՄՆ ֆինանսների նախարարության հայտարարության համաձայն՝ Ռուսաստանից դուրս «Լուկոյլ» բենզալցակայաններում գործարքները թույլատրվելու են մինչև 2026 թվականի ապրիլի 29-ը։ Վաշինգտոնը պարզաբանել է, որ միջոցներ է ձեռնարկել մանրածախ բենզալցակայանների հետ «սովորական գործարքներ կատարող սպառողներին և մատակարարներին հասցվող վնասը մեղմելու» համար։
Այս որոշումը փաստացի թույլ է տալիս «Լուկոյլ» ապրանքանիշի բենզալցակայաններին շարունակել գործունեությունը ԱՄՆ-ում և այլ երկրներում՝ միաժամանակ կանխելով միջոցների արտահոսքը դեպի Ռուսաստան, որը 2022 թվականի փետրվարից գտնվում է ԱՄՆ-ի և ԵՄ-ի պատժամիջոցների տակ։ Այն նաև մասամբ կասեցնում է ԱՄՆ նախագահ Դոնալդ Թրամփի հոկտեմբերին ընդունած միջոցառումները։
Այս քայլի մասին հայտարարվել է Սպիտակ տան ներկայացուցիչների և Ռուսաստանի նախագահ Վլադիմիր Պուտինի դեկտեմբերի սկզբին Մոսկվայում կայացած հանդիպումից հետո, որի նպատակը Ուկրաինայում պատերազմը դադարեցնելու պայմանների շուրջ փոխզիջումների հասնելն էր։
Ռուսական «Լուկոյլ» և «Ռոսնեֆտ» նավթային ընկերությունները, իրենց 34 դուստր ձեռնարկությունների հետ միասին, այս տարվա հոկտեմբերին հայտնվել էին ԱՄՆ-ի և Մեծ Բրիտանիայի պատժամիջոցների տակ։ Ինչպես նշում է AFP-ն, դրանք Թրամփի կողմից Ռուսաստանի դեմ կիրառված ամենաարդյունավետ միջոցներն էին։