Այսուհետ փորձելու ենք հնարավորինս զուսպ ու պարկեշտ գործել. ՔՊ պատգամավորը՝ կուսակցության Էթիկայի կանոնագրքի մասին

– Այն կուսակցության ինստիտուցիոնալ կայացման գործնական կանոնների ու վարքագծերի սահմանում է, ու մենք վաղուց էինք որոշել կուսակցականի վարքագծի կանոնները ամփոփող կանոնագիրք ունենալ: Այդ իսկ պատճառով էլ որոշեցինք դա իրականություն դարձնել, ու հենց այս փուլում դա ավարտուն տեսք ստացավ: Սա լինելու է մեր կուսակցականների համար հիմք՝ իրենց վարքը կազմակերպել ու դիտարկել հենց այդ կանոնագրքի շրջանակներում: 

– Այսինքն՝ բոլորը պարտավոր են հետևել կանոնագրքի կետերի՞ն:

– Այո՛, այն իրենից ենթադրում է յուրաքանչյուր կուսակցականի անհատական պատասխանատվություն, լինի քաղաքական գործիչ կամ հանրային ծառայության մեջ գտնվող պաշտոնյա և այլն: Բոլորին, բոլորին դա վերաբերելի է, շարքային կուսակցականից մինչև ամենավերին ատյաններ: 

– Կուսակիցը, որը չի հետևի այդ կանոններին կամ կշեղվի դրանցից, ի՞նչ պատժի կենթարկվի, կա՞ն հստակ պատասխանատվության ենթարկելու կանոններ:

– Վերահսկողությունն իրականացնում է կուսակցության վերահսկող հանձնաժողովը, որը պարտադիր ներկա է լինում կուսակցության վարչության նիստերին ու վերահսկողություն է իրականացնում կուսակցականների հանդեպ, ու թե որ հարցերի վերաբերյալ պետք է կարգապահական վարույթ հարուցի, արդեն գալիս է վարչության տիրույթ, ու վարչությունն էլ կայացնում է կարգապահական վարույթի որոշումը։

– Կանոնագիրքը երբվանի՞ց է գործելու:

– Հրապարակման պահից: 

– Տիկի՛ն Ղազարյան, այսինքն՝ սրանից հետո, երբ խորհրդարանում իշխանություն-ընդդիմություն լեզվակռիվ կամ վեճ լինի, հանրությունն էլ չի՞ տեսնելու 18+ հայհոյանքներ, կադրեր: 

– Նման դեպքեր եղել են երկուստեք, իսկ ձեր ասած 18+ կադրերի ռիսկ ես ավելի շատ նկատել եմ ընդդիմադիրների կողմից, բայց մենք այսուհետ փորձելու ենք հնարավորինս զուսպ ու պարկեշտ գործել: Որպես իշխող կուսակցություն՝ մեր խոսքը պետք է լինի ավելի քաղաքակիրթ ու դուրս չգա քաղաքակրթության շրջանակներից, դա նաև մեզ համար է արդյունավետ լինելու: 

– Այսինքն՝ դուք ձեր մասով ամեն ինչ անելու եք, որպեսզի ամեն բան քաղաքակրթության սահմաններո՞ւմ մնա:

– Այո՛, այո՛, վերջապես մենք պետք է զարգացնենք քաղաքակիրթ խոսքը Հայաստանում, նաև հանձնառու ենք դրա համար:

– Տիկի՛ն Ղազարյան, ասացիք արդեն, որ գաղափարը վաղուց եք ունեցել, բայց մարդկանց ինչպե՞ս կհամոզեք, կապացուցեք, որ այս ամենը չի արվում նախընտրական տրամաբանությունից ելնելով, որովհետև արդեն կան պնդումներ, որ դուք այս քայլին գնում եք հիմա, որովհետև առջևում խորհրդարանական ընտրություններ են:

– Շատ հետաքրքիր միտում եմ նկատում այս առումով, որովհետև հենց նոր Ազգային ժողովում քննարկում էինք «Առողջության համընդհանուր ապահովագրության մասին» օրենքի նախագիծը, ու այստեղ էլ ասացին, որ դա նախընտրական քարոզարշավի մի մաս է, բայց դուք էլ գիտեք, որ դա ներառված է Կառավարության 2021-2026 թվականների ծրագրում, որ դա անպայման արվելու է: 

Պարտադիր զինծառայության ժամկետի կրճատման նախագիծը ևս կապեցին նախընտրական գործընթացների հետ, հիմա էլ՝ էթիկայի պահը: Կուսակցության նոր վարչությունը ընտրվել է սեպտեմբերին, ու հենց նա էլ մշակել է Էթիկայի կանոնագիրքը, կուսակցության ինստիտուցիոնալ կայացմանն ուղղված շատ աշխատանքներ ենք մենք վերջին երեք տարում իրականացրել, ուղղակի դրանք հանրության համար տեսանելի չեն, որովհետև ներքին հարցեր են: 

– Լրագրողների հետ աշխատելիս և՞ս ձեր կուսակիցները պետք է հիմնվեն այս կանոնագրքի վրա:

– Բոլորի, բոլորի, քանի որ մենք թափանցիկ ենք աշխատում թե՛ մեր ֆինանսական աղբյուրների, թե՛ մեզ հետ կապված լրատվականի ֆինանսական աղբյուրների մասով, մենք նաև ցանկանում ենք, որ թափանցիկ լինի այն լրագրողների աշխատանքը, որոնք մեզ հետ առնչվում են, ու դա արդարացի է: Ես իմ խոսքում էլ ասացի, որ ես կուզեի տեսնել այնպիսի մի կուսակցություն Հայաստանում, որ նման թափանցիկությամբ ինքը իր էթիկայի կանոնները մեզ ի ցույց կդնի, որ հասկանանք՝ տվյալ կուսակցականն իրենց ներքին կանոնադրությունը խախտո՞ւմ է, թե՞ չէ: 

– Ստացվում է, որ նորմա՞լ եք համարում, որ պատգամավորը լրագրողին ասի՝ չեմ պատասխանում ձեր հարցերին, որովհետև դուք այսինչ կամ այնինչ լրատվամիջոցից եք, օրինակ, այդ կերպ թիրախավորում են լրագրողին, կամ ասում են՝ գնա քո տիրոջ ունեցվածքով հետաքրքրվի, հարցեր տուր: 

– Պատգամավորի դիրքորոշումն ու ընտրությունն են, թե որ լրատվականին հարցազրույց չտա, սա պատգամավորի իրավունքն է, բայց այդ ամենը պետք է արվի հարգալից ձևով, ոչ թե վիրավորելով: Բայց երբ նման դեպքեր լինեն, մեր վերահսկող հանձնաժողովը այդ արտահայտությունը քննության է առնելու ու որոշելու է՝ կա՞ այդտեղ լուրջ էթիկական խախտում, թե՞ ոչ:

– Տիկի՛ն Ղազարյան, հույս ունե՞ք, որ այս կանոնագիրքը արդյունավետ է լինելու ու իրավիճակը բարելավելու է:

– Մենք մշտապես ցանկացել ենք, որ ընդհանուր վիճակը դեպի դրական գնա, ու երբեք հակում չենք ունեցել ու չենք սադրել որևէ իրադրություն, որ վեճ կամ փոխադարձ վիրավորանքներ լինեն, միշտ մյուս կողմից են եղել անհանդուրժողականություն, աշխատել չցանկանալու միտում և այլն: Նման դեպքերը միշտ հակառակ կողմից են եղել, մենք մտավախություն չունենք, որ մեր կողմից խախտում կլինի: 

– Կարելի՞ է ասել, որ այս կանոնագրքով ընդդիմությանը ձեռնոց եք նետում:

– Չէ, ձեռնոց նետելու խնդիր չկա, մենք մեր կուսակցության գործունեության կարգավորման գործընթացների մեջ ենք և մեր կուսակցականների վարքագծի էթիկայի կանոններն ենք սահմանել, որևէ մեկին ձեռնոց նետելու հարց չունենք այս պարագայում:

Քրիստինե Աղաբեկյան

MediaLab.am