Իրենց քաղաքականությունն իրականացնելիս ԱՄՆ իշխանությունները ցանկանում են, որ «ջունգլիների օրենքը» գերիշխի թե՛ Մերձավոր Արևելքում, թե՛ ամբողջ աշխարհում։ Այս մասին հայտարարել է Իրանի արտաքին գործերի նախարար Աբբաս Արաղչին։
«Այո, ցավոք, ամերիկյան քաղաքականությունն իսկապես մղում է աշխարհը այս ուղղությամբ, և այն, ինչ դուք անվանում եք «ջունգլիների օրենք», շատ ճիշտ նկարագրում է ստեղծված իրավիճակը և գործնականում դարձել է գերիշխող կանոն», – նշել է նա օմանցի հեռուստահաղորդավար Մուսա ալ-Ֆարայիի հետ հարցազրույցում։
Արաղչիի կարծիքով՝ համաշխարհային բոլոր փոխհարաբերությունները տեղափոխվում են դեպի «ջունգլիների օրենք», որտեղ ով ավելի շատ իշխանություն ունի, անձեռնմխելիություն է ստեղծում իր և իր պաշտպանության տակ գտնվողների համար։ Այսպիսով, ինչպես նշել է Իրանի արտաքին գործերի նախարարը, Մերձավոր Արևելքում Իսրայելը լիակատար անձեռնմխելիություն ունի Միացյալ Նահանգներից և որոշ եվրոպական երկրներից, որոնք արդարացնում են նրա բոլոր գործողությունները: «Այս ռեժիմը (նկատի ունենալով Իսրայելը խմբ.) հարձակվել է երբ և որտեղ ցանկացել է։ Վերջին երկու տարիների ընթացքում այն ներխուժել է յոթ երկիր և ներկայումս օկուպացրել է երեքի տարածքը», – ընդգծել է Իրանի արտաքին գործերի նախարարը։