Վարչապետ Նիկոլ Փաշինյանի հետ հանդիպած և, ըստ էության, Հայ Առաքելական Եկեղեցուց իրենց դուրս դրած 10 բարձրաստիճան հոգևորականները նոր կայք են գործարկել։
Վերջերս «հայտնված» barenorogum.am կայքում տեղադրված է 10 առանձնացյալ հոգևորականների վերջին հայտարարությունը, որը ստացել է «Հայ Առաքելական Սուրբ Եկեղեցու Նվիրապետական Աթոռների Գահակալներին, եպիսկոպոսներին, վարդապետ և քահանա հայրերին, ՀՀ պետական, քաղաքական գործիչներին, մտավորականներին, հավատավոր մեր ժողովրդին» անվանումը։
Կայքի հետ կապված հարցերին, համաձայն զետեղված տեղեկատվության, պատասխանում է Արարատյան Հայրապետական թեմի աշխատակազմի ղեկավար Ալմաստ Մուրադյանը։
24News-ի տեղեկությունների համաձայն, Մուրադյանը իրականացրել է նաև Նավասարդ արքեպիսկոպոսի գործավարի գործառույթները։
24News-ը փորձեց զրուցակցից հետաքրքրվել, թե ի՞նչ նպատակ է հետապնդում կայքի գործարկումը, ինչի՞ համար է բացվել։
«Կայքը նախատեսված է հայտարարության համար, այն արդեն դրված է, տեսնում եք, եթե ինչ-որ նյութեր լինեն, դրանից արդեն պարզ կլինի, թե որոնք են կայքի նյութերը»,-նշեց նա։
Մեր այն դիտարկմանը, թե արդոք այդ կերպ նշված բարձրաստիճան հոգևորականները Մայր Աթոռից առանձին գործունեություն չե՞ն ծավալում, նա նշեց, որ յուրաքանչյուր մարդ իրավունք ունի կայք բացել և հայտարարություն դնել։
«Որևէ մեկն օրենքով սահմանափակած չէ։ Այսինքն՝ յուրաքանչյուր մարդ, որ բացի կայք ու դնի հայտարարություն, պետք է Մայր Աթոռից թույլտվությո՞ւն ստանա։ Դա ձեր մեկնաբանությունն է, ինչպես ուզում եք՝ մեկնաբանեք, ես դա չեմ մեկնաբանում», – ասաց Ալմաստ Մուրադյանը։
Վերջում նա նշեց, որ կայքի աշխատանքները որևէ կապ չունեն Արարատյան Հայրապետական թեմի աշխատանքների հետ։