Վթարը տեղի է ունեցել կիրակի՝ օգոստոսի 16-ի գիշերը՝ տեղական ժամանակով մոտ 01:00-ին, Բուդապեշտից շուրջ 140 կիլոմետր արևելք՝ Մեզոկերեստեշ քաղաքի մերձակայքում գտնվող M3 մայրուղու վրա։ Ավտոբուսը դուրս է եկել ճանապարհի երթևեկելի հատվածից և շրջվել։
Հունգարիայի ոստիկանության նախնական տվյալներով՝ վթարի հավանական պատճառը վարորդի՝ ղեկին քնելն է։ Վարորդը ձերբակալվել է, դեպքի հանգամանքները քննվում են։
Ավտոբուսում եղել է 59 մարդ՝ 57 ուղևոր և երկու վարորդ։ Ուղևորները Լեհաստանի քաղաքացիներ էին և վերադառնում էին Բոսնիա և Հերցեգովինայից, որտեղ ուխտագնացության էին մեկնել Մեջուգորյե։
Վերջին տվյալներով՝ 12 մարդ զոհվել է։ Առնվազն 10 մարդ ծանր վնասվածքներ է ստացել:
Ողբերգության կապակցությամբ ցավակցություններ են հայտնել Հունգարիայի վարչապետ Պետեր Մագյարը և Լեհաստանի նախագահ Կարոլ Նավրոցկին։ Մագյարը ցավակցություն է հայտնել զոհերի ընտանիքներին և շնորհակալություն հայտնել դեպքի վայրում աշխատած փրկարարներին ու արտակարգ ծառայությունների աշխատակիցներին։ Նավրոցկին իր խորին վշտակցությունն է հայտնել զոհերի հարազատներին և մերձավորներին։
Լեհաստանի արտաքին գործերի նախարար Ռադոսլավ Սիկորսկին հայտնել է, որ լեհական հյուպատոսական ծառայությունները կապի մեջ են Հունգարիայի իշխանությունների հետ և աջակցություն են ցուցաբերում վթարից տուժածներին ու նրանց ընտանիքներին։