Խանութից միս, ձուկ, կաթ, պանիր կամ ձու գնելիս շատերը իրականում չեն էլ պատկերացնում, թե ինչպես են ստեղծվում այդ մթերքները, մինչդեռ լավ արտադրանք ստանալու հաջողության բանաձևն է՝ բանիմաց մասնագետներ, ճիշտ խնամք և որակյալ անասնակեր:
Եթե համբերատար եք, հոգատար, ունեք մեծ սեր կենդանիների և առհասարակ գյուղատնտեսության հանդեպ, ստանալով մասնագիտական գիտելիքներ՝ ցանկանում եք զբաղվել գյուղատնտեսական կենդանիների բուծմամբ, խնամքով, կերակրման ռեժիմի մշակմամբ և մթերատվության բարձրացմամբ՝ ապահովելով կենդանիների ճիշտ զարգացումն ու վերարտադրությունը, ինչպես նաև ձեռք բերել և կիրառել գիտական և տեխնոլոգիական առաջադեմ մեթոդներ, ապա անասնաբույծի օգտակար, զարգացող և շահավետ մասնագիտությունը նախատեսված է ձեզ համար:
Մասնագիտությունն ունի հին արմատներ, ավանդույթներ, այսօր էլ գյուղատնտեսության առաջատար և կարևորագույն ոլորտներից է, որն ապահովում է մարդկանց բարեկեցությունն ու կենսամակարդակը, նպաստում սոցիալական ու տնտեսական զարգացմանը, ինչպես նաև անհրաժեշտ հումք է մատակարարում վերամշակող արդյունաբերությանը՝ սննդի, տեքստիլի, կաշվի և մի շարք այլ ճյուղերի համար:
«Մասնագիտություն» հաղորդման հյուրն է Հայաստանի ազգային ագրարային համալսարանի մորֆոլոգիայի և կենդանագիտության ամբիոնի դոցենտ, գյուղատնտեսական գիտությունների թեկնածու Տիգրան Չիթչյանը: