Իսպանիայի աջակողմյան ընդդիմադիր Ժողովրդական կուսակցության առաջնորդ Ալբերտո Նունյես Ֆեյխոոն կոչ է արել Եվրամիությանը միջամտել Հյուսիսային Աֆրիկայում գտնվող Սեուտա ինքնավար քաղաքի պաշտպանությանը, քանի որ այն ԵՄ տարածք է և նրա արտաքին սահմանը։
«ՌԻԱ Նովոստի»-ի թղթակցի փոխանցմամբ՝ Ֆեյխոոն ելույթ է ունեցել Սեուտայի կենտրոնում գտնվող «Պլազա դե Աֆրիկա» հրապարակում։
«Սա Եվրոպա է, ինչպես Եվրամիությունը կազմող 26 երկրներից ցանկացած այլ տարածք, որոնք Իսպանիայի հետ կազմում են այն։
Հետևաբար, դրա պաշտպանության և անվտանգության պատասխանատվությունը կրում են բոլոր եվրոպական իշխանությունները, ինչպես նաև, իհարկե, ազգային կառավարությունը», – հայտարարել է քաղաքական գործիչը։
Նրա խոսքով՝ Սեուտայի ինքնիշխանության և տարածքային ամբողջականության պաշտպանությունը պետք է լինի ԵՄ բոլոր 27 անդամ պետությունների պարտավորությունը։
Քաղաքական գործիչը շեշտել է, որ քաղաքը Իսպանիայի և Եվրոպայի տարածք է, իսկ Մարոկկոյի հետ նրա ցամաքային սահմանը ԵՄ արտաքին սահմանն է Աֆրիկայում։