Մեծ Բրիտանիայի թագավոր Չարլզ III-ը դարձել է առաջին միապետը, որը հրապարակել է իր հարկային տվյալները․ 2024-2025 ֆինանսական տարում նա վճարել է 12,9 միլիոն ֆունտ ստերլինգ, ինչը նրան դասում է Միացյալ Թագավորության 100 խոշորագույն հարկատուների շարքին։
Արքայազն Ուիլյամը նույն ժամանակահատվածում վճարել է 7,76 միլիոն ֆունտ ստերլինգի հարկ։ Թագավորական պալատը հայտարարել է, որ Չարլզ III-ը և թագուհի Կամիլան Բուքինգհեմյան պալատի վերանորոգման ավարտից հետո այնտեղ չեն տեղափոխվի և կշարունակեն բնակվել Կլարենս Հաուսում, իսկ թագավորական պալատը կծառայի բացառապես պաշտոնական միջոցառումների համար։
Միապետության պետական ֆինանսավորումը՝ Սուվերեն դրամաշնորհը, 2027-2028 ֆինանսական տարվանից սկսած կսահմանվի տարեկան 99,9 միլիոն ֆունտ ստերլինգ՝ հիմնականում պատմական շենքերի պահպանման և էներգաարդյունավետության բարձրացման նպատակով։
Հաշվետվությունն արժանացել է հասարակական գործիչների քննադատությանը։ Նրանք պնդում են, որ միապետության ծախսերը դեռևս չափազանց բարձր են, իսկ թագավորական ունեցվածքից ստացվող եկամուտների այն մասը, որը ներկայումս մնում է ընտանիքին, պետք է ուղղվի պետական բյուջե։