Հարավային Կորեայի մայրաքաղաք Սեուլում արդեն երկրորդ օրն անընդմեջ շարունակվում են զանգվածային բողոքի ակցիաները՝ կապված տարածաշրջանային ընտրությունների արդյունքների և ընթացակարգային խախտումների հետ։ Այս մասին հաղորդում է Yonhap լրատվական գործակալությունը։
Մոտ երկու հազար ցուցարարներ շրջափակել են մայրաքաղաքի արևելյան հատվածում՝ Օլիմպիական պարկում տեղակայված հանդբոլի մարզադաշտը, որտեղ իրականացվել է ընտրատեղամասերից ստացված ձայների հաշվարկը։ Ցուցարարները կենտրոնացել են մարզադաշտի բոլոր մուտքերի մոտ՝ փաստացի արգելափակելով այնտեղ գտնվող ընտրական հանձնաժողովի անդամների ելքը։
Ըստ հաղորդվող տվյալների՝ հանձնաժողովի 20-30 անդամ նախորդ օրվա ժամը 15:00-ից (Երևանի ժամանակով՝ 10:00-ից) շարունակում է մնալ մարզադաշտի ներսում։ Անվտանգությունն ապահովելու համար դեպքի վայր է մոբիլիզացվել շուրջ 400 ոստիկան։ Առայժմ իրավապահների և ցուցարարների միջև բախումներ չեն գրանցվել։
Դեպքի վայրից հաղորդվում է, որ բողոքի ակցիայի մասնակիցների զգալի մասը երիտասարդներ են։ Նրանք ծածանում են Հարավային Կորեայի պետական դրոշը և պահանջում նոր ընտրություններ։ Ցուցարարների պաստառներին առկա են աջակողմյան ուժերին բնորոշ կարգախոսներ՝ ուղղված «անարդար ընտրությունների» դեմ։
Զանգվածային դժգոհության հիմնական պատճառը Սեուլի մի շարք ընտրատեղամասերում քվեաթերթիկների անբավարար քանակն է եղել։ Հունիսի 3-ին՝ քվեարկության օրը, մայրաքաղաքի 14 տեղամասում քվեաթերթիկները սպառվել են, ինչի հետևանքով քվեարկությունը երկարաձգվել է մի քանի ժամով։ Այդ տեղամասերից 12-ը գտնվում են Սոնփհա շրջանում, որտեղ էլ տեղակայված է Օլիմպիական պարկը։
Կենտրոնական ընտրական հանձնաժողովը հայտնել է, որ երկրի ողջ տարածքում լրացուցիչ քվեաթերթիկներ են ուղարկվել 67 ընտրատեղամաս, սակայն 17 տեղամասում դրանք չեն օգտագործվել։ Լրացուցիչ քվեաթերթիկներ ստացած տեղամասերից 35-ը եղել են Սեուլում, որոնցից 15-ը՝ Սոնփհա շրջանում։ Ընդհանուր առմամբ երկրում գործել է 14 288 ընտրատեղամաս։
Նախնական արդյունքներով՝ Սեուլում շուրջ 2%-ից պակաս առավելությամբ հաղթել է ընդդիմադիր «Քաղաքացիական ուժ» կուսակցության թեկնածու, գործող քաղաքապետ Օ Սե Հունը։ Միաժամանակ, երկրի 16 շրջաններից 12-ում նրա կուսակիցները պարտություն են կրել։
Այս արդյունքները զգալիորեն տարբերվում են 2022 թվականի տարածաշրջանային ընտրություններից, երբ աջակողմյան ուժերը հաղթել էին 17 շրջաններից 12-ում, իսկ մնացածում՝ ներկայումս իշխող «Տոբուրո» կուսակցությունը։ Իրադարձություններին շարունակում են հետևել ինչպես տեղական, այնպես էլ միջազգային լրատվամիջոցները։