ԱՄՆ պետքարտուղար Մարկո Ռուբիոն Իսրայելի և Լիբանանի ղեկավարությանը առաջարկել է հրադադարի նոր նախաձեռնություն: Այս մասին X-ին հայտնել է Axios-ի լրագրող Բարաք Ռավիդը՝ հղում անելով ԱՄՆ պաշտոնյայի:
«Այս իսրայելա-լիբանանյան բանակցությունները առաջ մղելու համար ԱՄՆ-ը առաջարկել է, որ որպես առաջին քայլ արմատական շիական շարժում «Հեզբոլլահը» դադարեցնի Իսրայելի վրա բոլոր հարձակումները: Դրա դիմաց Իսրայելը կխուսափի Բեյրութում հակամարտության սրումից», – նշվում է հրատարակության մեջ։
Աղբյուրի տվյալներով՝ վերջին 48 ժամվա ընթացքում Ռուբիոն հեռախոսազրույցներ է ունեցել Լիբանանի նախագահ Ջոզեֆ Աունի և Իսրայելի վարչապետ Բենիամին Նեթանյահուի հետ։
Ռավիդի զրուցակիցը պնդել է, որ Լիբանանի առաջնորդը փորձել է առաջ մղել այս նախաձեռնությունը, սակայն Լիբանանի խորհրդարանի խոսնակ Նաբիհ Բերիի պատասխանը «խուսափողական և հիասթափեցնող» էր։ Խոսնակը նշել է, որ կարող է երաշխավորել, որ «Հեզբոլլահը» կպահպանի հրադադարը։ Այնուամենայնիվ, նա կոչ է արել Իսրայելին առաջինը դադարեցնել ռազմական գործողությունները։