ԱՄՆ նախագահ Դոնալդ Թրամփը հայտարարել է, որ Վաշինգտոնը նոր թափով կվերսկսի հարվածները Իրանի ուղղությամբ, եթե Թեհրանի հետ նոր համաձայնագիր չկնքվի, հայտնել է ՏԱՍՍ-ը՝ հղում անելով Axios պորտալին։
«Մենք ցանկանում ենք գործարք կնքել։ Նրանք այժմ այնտեղ չեն, որտեղ մենք կցանկանայինք տեսնել։ Նրանք ստիպված կլինեն գնալ դրան, այլապես նրանց ուժեղ հարվածներ կհասցվեն, ինչը մենք չենք ցանկանում»,- նշել է Սպիտակ տան ղեկավարը։ Թրամփը հավելել է, որ եթե Թեհրանը չներկայացնի Վաշինգտոնին բավարարող նոր առաջարկ, Իրանին հասցվող հարվածները կլինեն «շատ ավելի հզոր, քան նախկինում»։
Axios-ի տվյալներով՝ մայիսի 19-ին ԱՄՆ նախագահը նախատեսում է հանդիպում անցկացնել ազգային անվտանգության թիմի անդամների հետ՝ քննարկելու Իսլամական Հանրապետության դեմ ռազմական գործողությունների հետագա տարբերակները։ Նշվում է նաև, որ մայիսի 16-ին Թրամփն արդեն իսկ քննարկել է իրանական թեման փոխնախագահ Ջեյ Դի Վենսի, պետքարտուղար Մարկո Ռուբիոյի և ԿՀՎ ղեկավար Ջոն Ռետկլիֆի հետ։
ԱՄՆ-ն և Իսրայելը հարձակվել էին Իրանի վրա փետրվարի 28-ին, ինչին ի պատասխան Թեհրանը որոշել էր փակել Հորմուզի նեղուցը։
Ապրիլի 7-ին Թրամփը հայտարարել էր երկշաբաթյա երկկողմանի հրադադարի մասին, իսկ ապրիլի 21-ին միակողմանիորեն երկարաձգել այն՝ միաժամանակ սահմանելով իրանական նավահանգիստների շրջափակում։ Իրանն իր հերթին հայտարարել է, որ մտադիր չէ ճանաչել նման միջոցները և գործելու է սեփական շահերին համապատասխան։
