Հայաստանի Հանրապետութեան մէջ Միացեալ Նահանգներու դեսպանատունը ողջունած է Հայաստանի եւ Թուրքիոյ միջեւ երկկողմանի առեւտուրի սահմանափակումները վերցնելու յայտարարութիւնը:
«Այս քայլը ցոյց կու տայ երկու երկիրներու յանձնառութիւնը` ընդլայնելու տնտեսական կապերը եւ խթանելու Հարաւային Կովկասի մէջ տեւական խաղաղութիւնն ու բարեկեցութիւնը», կը նշուի դեսպանատան հրապարակած յայտարարութեան մէջ:
Թուրքիոյ արտաքին գործոց նախարարութեան բանբեր Էօնճիւ Քեչելի մէկ օր առաջ յայտարարած էր, որ 11 մայիս 2026 թուականի դրութեամբ աւարտած են Հայաստանի եւ Թուրքիոյ միջեւ ուղիղ առեւտուրի մեկնարկի նախապատրաստական աշխատանքները:
Նոր կարգաւորման հիմամբ Թուրքիայէն երրորդ երկիր, ապա Հայաստան ուղարկուող ապրանքներու վերջնական նպատակակէտը կարելի պիտի ըլլայ նշել իբրեւ Հայաստան: Նոյն տրամաբանութեամբ` Հայաստանէն նոյն ճամբով գացող ապրանքներու ծագման երկիր կրնայ նշուիլ Թուրքիան:
Մինչեւ հիմա Հայաստանի եւ Թուրքիոյ միջեւ ապրանքաշրջանառութիւնը հիմնականին մէջ կը կատարուէր միջնորդ երկիրներու միջոցով:
Եւրոպական Միութիւնը «Ջերմօրէն» Կ՛ողջունէ
Եւրոպական Միութիւնը ջերմօրէն կ՛ողջունէ Հայաստանի եւ Թուրքիոյ միջեւ ուղիղ առեւտուրի մեկնարկը: Այս մասին ըսած է Եւրոպական Միութեան դիւանագիտական ծառայութեան մամլոյ բանբեր Անիթա Հիփեր:
«Ասիկա անոնց յարաբերութիւններու կարգաւորման հոլովոյթին մէջ ուշագրաւ զարգացում է, ինչ որ արտայայտուեցաւ նաեւ 28 ապրիլ 2026-ին երկու երկիրներուն միջեւ երկաթուղային հաղորդակցութեան վերականգնման հարցերով երկկողմանի աշխատանքային խումբի վերջին հանդիպումով, որ մենք ողջունած էինք:
«Այս նշանակալի քայլը կրնայ խթանել երկու երկիրներուն միջեւ առեւտրական եւ տնտեսական կարելիութիւնները` դրական ազդեցութիւն ունենալով թէ՛ ամբողջ Հարաւային Կովկասի, թէ՛ ալ Եւրոպական Միութեան համար:
«Մենք կը խրախուսենք երկու երկիրները շարունակելու համատեղ աշխատանքը, ներառեալ երկկողմ սահմանի վերաբացման ուղղութեամբ», գրած է Հիփեր: