30.04.2026 | 22:51
Այն ամենը, ինչ կկամենաք, որ մարդիկ
ձեզ անեն, այդպես և դուք արեք նրանց:
Բնության Օրենքներից սովորեք այն դասը, ուր իմացվում է` որ Աստծո ներգործության ու հսկումի տակ է ողջ Բնությունը:
Բնությունը` հավիտենական մտածումի արտահայտությունն է ժամանակի մեջ: Սիրեք տեսանելի աշխարհը, ընկալեք հավիտենական մտածումը, և երբ կարողանաք կարդալ մտածումները Երկնավոր Հոր, այդժամ դուք իսկապես կճանաչեք ՆՐԱՆ:
Ամեն ինչի մեջ տեսեք Իմ ներկայությունը: Ընդունեք ու սիրեք այն բոլոր ձևերը, որոնցով Ես վարվում եմ ձեզ հետ: Միշտ իմացեք, որ ամեն ինչ կարգին է, իսկ ուշացնելը այլ բան չէ, քան ձեր Երկնավոր Հոր սիրազեղ զսպումը. որովհետև այդ ոչ մերժում է, ոչ էլ` չկամություն, այլ Աստվածային վերաբերմունքը մի Հոր, որ հազիվ է դիմանում ուշացնելուն:
ՈՒշացում պետք է լինի երբեմն: Ձեր կյանքն այնքան սերտորեն է կապված ուրիշների հետ, կյանքի պարագաները այնքան սերտ առնչություններ ունեն, որ եթե ձեր ցանկությունները անմիջապես կատարվեն, շատ դեպքում այդ կարող է պատճառ լինել, որ այլոց` ոչ պակաս թախանձագին աղոթքները անպատասխան մնան:
Բայց մի պահ մտածեք այն սիրալիր ու հոգատար խորհրդածության մասին, որ աշխատում է ներդաշնակել ու համաձայնեցնել ձեր բոլոր ցանկությունները, ձգտումներն ու աղոթքները:
ՈՒրեմն ուշացնելը մերժում չէ, ոչ էլ անուշադրության մատնել է նշանակում, այլ այն առիթ է Աստծո համար` լուծելու ձեր խնդիրները և կատարելու ձեր բաղձանքները` ձեզ համար հնարավոր ամենալավ կերպով:
Իմ զավակներ, վստահեք Ինձ: Հիշեք, որ ձեր Արարիչը նաև ձեր ծառան է, արագ հասցնելու, արագ կատարելու և հավատարիմ իրագործելու մեջ: Այո, ամեն ինչ կարգին է: