Չինաստանի արտաքին գործերի նախարար Վան Ին ԱՄՆ պետքարտուղար Մարկո Ռուբիոյի հետ հեռախոսազրույցում քննարկել է Պեկին-Վաշինգտոն հարաբերությունները, Մերձավոր Արևելքում տիրող իրավիճակը և Թայվանի հարցը, հաղորդում է CGTN-ը։
«Վան Ին նշել է, որ երկու կողմերն էլ պետք է պահպանեն լուրջ ջանքերի միջոցով ձեռք բերված կայունությունը, պատրաստ լինեն բարձր մակարդակի փոխազդեցություններին, ընդլայնեն համագործակցության ոլորտները, լուծեն տարաձայնությունները և փնտրեն փոխադարձ հարգանքի և խաղաղ համակեցության վրա հիմնված փոխշահավետ համագործակցության հասնելու ուղիներ», – ասվում է հայտարարության մեջ։
Ռուբիոն, իր հերթին, ԱՄՆ-Չինաստան կապերը անվանել է աշխարհի ամենակարևոր երկկողմ հարաբերությունները, ըստ չինական հեռուստաալիքի։ Պետքարտուղարը ընդգծել է, որ երկու կողմերը պետք է պահպանեն երկխոսությունը, ցուցաբերեն փոխադարձ հարգանք, համապատասխանաբար լուծեն տարաձայնությունները և ձգտեն կայունության երկկողմ հարաբերություններում։
Հեռուստաալիքը նշում է, որ կողմերը մտքեր են փոխանակել, ի թիվս այլ հարցերի, Մերձավոր Արևելքում ստեղծված իրավիճակի վերաբերյալ։