ԱՄՆ նախագահ Դոնալդ Թրամփը բացահայտել է կործանված ինքնաթիռի օդաչուի տարհանման փրկարարական գործողության մանրամասները: Իրանցիներին մոլորեցնելու համար զինվորականները սիմուլյացիա են արել յոթ տարբեր տարածքներում:
«Մենք ունեինք յոթ տարբեր տարածքներ: Նրանք (իրանցիները – խմբ.) շատ շփոթված էին: Նրանք ասացին. «Սպասեք, նրանք թիմեր ունեն այստեղ, նրանք թիմեր ունեն այնտեղ», – Սպիտակ տանը լրագրողներին ասել է Թրամփը:
Նրա խոսքով՝ փրկարարական գործողությանը մասնակցել է 155 ինքնաթիռ, այդ թվում՝ չորս ռմբակոծիչ, 64 կործանիչ, 48 տանկեր և 13 որոնողական-փրկարարական ինքնաթիռ: Նախագահը հավելել է, որ օդաչուն փրկվել է, բայց ծանր վիրավորվել է:
Ուրբաթ օրը Իրանի տարածքում խոցվել է երկու տեղանոց F-15E կործանիչ: Axios-ի տվյալներով՝ անձնակազմի երկու անդամներն էլ՝ օդաչուն և նավիգատորը, հաջողությամբ կապ են հաստատել միմյանց հետ՝ կատապուլտվելուց հետո: Պորտալի աղբյուրները նշել են, որ օդաչուն փրկվել է ինքնաթիռի անկումից մի քանի ժամ անց: Որոնողական-փրկարարական գործողության ընթացքում Իրանը խոցել է դրան մասնակցող ամերիկյան Black Hawk ուղղաթիռներից մեկը: Անձնակազմի անդամները վիրավորվել էին, սակայն փրկվել են:
Նավիգատոր/օպերատոր գտնելու համար պահանջվել է ավելի քան մեկ օր։ Փրկարարական գործողությունը սկսվել է շաբաթ օրը։ Մինչդեռ ԱՄՆ ռազմաօդային ուժերի կործանիչները հարվածել են տարածքում տեղակայված իրանական ուժերին՝ կանխելու համար, որ նրանք գտնեն անձնակազմի երկրորդ անդամին, նախքան դա կանեին ԱՄՆ հատուկ նշանակության ուժերը։