Իրանը պետք է համաձայնագիր կնքի Միացյալ Նահանգների հետ՝ պատերազմը ավարտելու համար՝ սահմանափակելով իր միջուկային ծրագիրը և վերաբացելով Հորմուզի նեղուցը՝ պատժամիջոցների վերացման դիմաց։ Այս մասին հայտարարել է Իրանի նախկին արտգործնախարար Մոհամմադ Ջավադ Զարիֆը։
2013-2021 թվականներին արտաքին գերատեսչությունը գլխավորող Զարիֆը, որ եղել է 2015 թվականի միջուկային համաձայնագրի հիմնական ճարտարապետներից մեկը, ամերիկյան Foreign Affairs հանդեսում հրապարակված հոդվածում նշել է, որ Թեհրանը հակամարտությունում ունի «վերին դիրք» ԱՄՆ-ի և Իսրայելի նկատմամբ, սակայն ընդգծել է, որ անհրաժեշտ է դադարեցնել պատերազմը՝ խուսափելու համար քաղաքացիական կորուստներից և ենթակառուցվածքների վնասումից։
«Իրանը պետք է իր առավելությունը օգտագործի ոչ թե պատերազմը շարունակելու, այլ հաղթանակ հայտարարելու և համաձայնության հասնելու համար, որը կավարտի այս հակամարտությունը և կկանխի հաջորդը»,- գրել է Զարիֆը։
Նա առաջարկել է, որ Իրանը համաձայնի սահմանափակել իր միջուկային ծրագիրը և վերաբացի Հորմուզի նեղուցը՝ բոլոր պատժամիջոցների վերացման դիմաց։ Նրա խոսքով՝ նման առաջարկը նախկինում Վաշինգտոնը չէր ընդունի, սակայն այժմ կարող է փոխվել իրավիճակը։
Զարիֆը նաև նշել է, որ Իրանը պետք է պատրաստ լինի ԱՄՆ-ի հետ փոխադարձ «ոչ ագրեսիայի պայմանագրի» և տնտեսական հարաբերությունների վերականգնման։ Թեհրանի և Վաշինգտոնի միջև դիվանագիտական հարաբերությունները դադարել են 1979 թվականի Իսլամական հեղափոխությունից հետո։
Սա այս հակամարտության ընթացքում առաջին դեպքերից է, երբ Իրանում բարձր մակարդակի գործիչը բացահայտ կոչ է անում դադարեցնել պատերազմը և հասնել համաձայնության, այն դեպքում, երբ ռազմական և քաղաքական ղեկավարությունը հիմնականում կոչ է անում շարունակել պայքարը մինչև ԱՄՆ-ի պարտությունը։
ԱՄՆ նախագահ Դոնալդ Թրամփը խոսել է Թեհրանի հետ շարունակվող բանակցությունների մասին՝ առանց մանրամասներ ներկայացնելու, միաժամանակ սպառնալով, որ համաձայնության չհասնելու դեպքում երկիրը «կվերադարձնի քարե դար»։
Զարիֆը X-ում գրել է. «Որպես իրանցի՝ զայրացած Դոնալդ Թրամփի անպատասխանատու ագրեսիայից և կոպիտ վիրավորանքներից, բայց միաժամանակ հպարտ մեր զինված ուժերով և դիմացկուն ժողովրդով, ես երկմտում էի այս խաղաղության ծրագրի հրապարակման հարցում»։
Նա հավելել է, որ համոզված է՝ պատերազմը պետք է ավարտվի Իրանի ազգային շահերին համապատասխան պայմաններով։
Զարիֆը նաև զգուշացրել է, որ թեև ԱՄՆ-ի և Իսրայելի դեմ պայքարը կարող է հոգեբանական բավարարվածություն տալ, այն կհանգեցնի միայն քաղաքացիական կորուստների և ենթակառուցվածքների հետագա ոչնչացման։