Շաբաթավերջին, Լաս Վեկասի մէջ (Մ. Ն.) տեղի ունեցաւ արհեստավարժ բռնցքամարտի երեկոյ, որուն ընթացքին հայ գեր-ծանր կշիռի մարտիկ Գուրգէն Յովհաննիսեան Մեքսիքայի Սեզար Նաւարոյի նաք-աութի ենթարկեց:
28 տարեկան Գուրգէնի համար, այս յաղթանակը իր յաջորդական 10-րդն էր արհեստավարժ բռնցքամարտի ծիրին մէջ, նախորդ ինն ալ ան կրցած է նաք-աութով յաղթել:
Կը սպասուի, որ «Պիկ Գուգ» ծածկանունով մարզիկը կը բարձրանայ «Պոքս Ռեք» համաշխարհային դասաւորման մէջ, ուր այժմ կը գրաւէ 37-րդ դիրքը:
Նոյն երեկոյեան` գլխաւոր մենամարտին, ամերիկացի Սեպասթիան Ֆունտորա յաղթեց իր հայրենակից Քիթ Թուրմանին եւ յաջողութեամբ պաշտպանեց Տապըլեու. Պի. Սի. աշխարհի ախոյեանի տիտղոսը միջին կշիռի առաջին կարգէն ներս:
Նշենք, թէ այս երեկոն տեղի ունեցաւ Էմ. Ճի. Էմ. Կրանտ արենայէն ներս: