Իրանը մերժել է հակամարտությունը կարգավորելու ԱՄՆ առաջարկները և առաջ է քաշել իր սեփական պայմանները, հաղորդում է Press TV-ն՝ հղում անելով իր աղբյուրին։
«Թեհրանը կդադարեցնի պատերազմը, երբ որոշի դա անել և երբ իր պայմանները կատարվեն», – ասվում է հայտարարության մեջ։
Ըստ լրատվամիջոցի՝ Իրանը պահանջում է.
- Դադարեցնել հակամարտությունը Մերձավոր Արևելքում «բոլոր ճակատներում և բոլոր դիմադրության խմբերի համար»։
- Մշակել պատերազմի կրկնությունը կանխելու հատուկ մեխանիզմներ։
- Երաշխավորել Իսլամական Հանրապետությանը պատճառված վնասների համար որոշակի փոխհատուցում։
- Ճանաչել Թեհրանի իշխանությունը Հորմուզի նեղուցի նկատմամբ։
Այսօր NYT թերթը, հղում անելով անանուն պաշտոնյաների, հաղորդել է, որ Միացյալ Նահանգները Իրանին է հանձնել 15 կետից բաղկացած ծրագիր։ Դրանց թվում են Թեհրանի կողմից իր միջուկային ծրագրից հրաժարվելը և այլ երկրներում միջնորդներին աջակցելը, Հորմուզի նեղուցի բացումը և հրթիռների քանակի ու հեռահարության սահմանափակումը: Դրա դիմաց Վաշինգտոնը առաջարկում է պատժամիջոցների մեղմացում և օգնություն քաղաքացիական միջուկային էներգիայի զարգացման գործում, մասնավորապես՝ Բուշերի ատոմակայանում:
Երկուշաբթի օրը Դոնալդ Թրամփը հայտարարեց, որ երկու կողմերը համաձայնության են եկել հրադադարի շուրջ, և հրամայեց հնգօրյա դադար տալ իրանական էներգետիկ օբյեկտների վրա հարձակումներին։ Թեհրանը, սակայն, պնդում է, որ բանակցություններ տեղի չեն ունեցել։ Երկրի խորհրդարանի խոսնակի խոսքով՝ ԱՄՆ նախագահը տարածում է «կեղծ լուրեր՝ մանիպուլյացիայի ենթարկելու համար»։