ԱՄՆ-ն և Իսրայելը հարվածել են Իրանի Հարավային Պարս և Ասալույե հանքավայրերի մի քանի նավթագազային ենթակառուցվածքային օբյեկտների, հայտնում է ՏԱՍՍ-ը՝ հղում անելով իրանական լրատվամիջոցներին։
Գործակալությունը, հղում անելով իսրայելական լրատվամիջոցներին, հայտնում է, որ Իսրայելի ռազմաօդային ուժերը հարձակվել են Իրանի ամենամեծ գազի վերամշակման գործարանի վրա։ Ավելի ուշ Բուշեհր նահանգի Ասալույե շրջանի նահանգապետը հայտարարել է, որ Հարավային Պարս հանքավայրի մի քանի օբյեկտների վրա հարվածներից հետո բռնկված հրդեհը մեկուսացվել է։
Հանքավայրի վրա հարվածից հետո Իրանի Իսլամական հեղափոխության պահապանների կորպուսը (ԻՀՊԿ) հայտարարել է Սաուդյան Արաբիայում, ԱՄԷ-ում և Կատարում նավթագազային օբյեկտների վրա հարձակվելու մտադրության մասին՝ մի քանի ժամվա ընթացքում։ Մասնավորապես, ԻՀՊԿ-ն հայտնել է, որ թիրախների թվում են եղել Սաուդյան Արաբիայի Ջուբեյլ նավթավերամշակման գործարանը, ԱՄԷ-ի Ալ Հոսն գազի հանքավայրը, ինչպես նաև Ռաս Լաֆանի նավթավերամշակման գործարանը և Կատարի Մեսայիդի նավթաքիմիական համալիրը։
Bloomberg-ի փոխանցմամբ՝ Թեհրանի կողմից հնարավոր հարվածների մասին հայտարարությունից հետո մի քանի նավթային ընկերություններ տարհանում են անձնակազմը Պարսից ծոցի օբյեկտներից։
Փետրվարի 28-ին ԱՄՆ-ն և Իսրայելը ռազմական գործողություն էին սկսել Իրանի դեմ: Իսլամական հեղափոխության պահապանների կորպուսը (ԻՀՊԿ, Իրանի զինված ուժերի էլիտար ստորաբաժանում) հայտարարել էր Իսրայելի վրա հարձակման լայնածավալ պատասխան գործողության մասին: Իրանը հարվածներ էր հասցրել Բահրեյնում, Հորդանանում, Կատարում, Քուվեյթում, ԱՄԷ-ում և Սաուդյան Արաբիայում ԱՄՆ թիրախներին: Մարտի 1-ին Իրանը հաստատել էր երկրի Գերագույն հոգևոր առաջնորդ Ալի Խամենեիի մահը:
