Կառավարության շենքի առջև տեղի է ունեցել բողոքի ակցիա՝ «Տաշիր» ընկերությունների խմբի նախագահ, բարերար և «Ուժեղ Հայաստան» կուսակցության առաջնորդ Սամվել Կարապետյանին ազատ արձակելու պահանջով․ ՖՈՏՈ
ԵՐԵՎԱՆ, 13 մարտի․/Նովոստի–Արմենիա/․ ՀՀ կառավարության շենքի առջև տեղի է ունեցել բողոքի ակցիա՝ «Տաշիր» ընկերությունների խմբի նախագահ, բարերար և «Ուժեղ Հայաստան» կուսակցության առաջնորդ Սամվել Կարապետյանին ազատ արձակելու պահանջով:
«Այսօր մենք հավաքվել ենք այստեղ՝ վարչապետի պաշտոնը զբաղեցնող անձից պահանջելով դադարեցնել «զանգով» արդարադատությունը, ապօրինի գործողությունները, որպեսզի Հայաստանում այլևս քաղբանտարկյալներ չլինեն: Մենք պահանջում ենք, որ կառավարության անդամներից որևէ մեկն իջնի մեզ մոտ, քանի որ պետք է նրան փոխանցենք մեր պահանջները»,- հայտարարել է ակցիայի կազմակերպիչներից մեկը:
Նա հավելել է, որ այսօր Հայաստանում ստեղծվել է մի իրավիճակ, երբ ամեն ինչ որոշվում է ոչ թե օրենքի շրջանակում, այլ մեկ անձի կամայական որոշումների արդյունքում:
Հավաքվածները վանկարկում էին «Ազատություն Սամվել Կարապետյանին», «Ազատություն Հայաստանին», «Ազատություն բոլոր կալանավորված հոգևորականներին, քաղբանտարկյալներին» կարգախոսները:
Ակցիայի մասնակիցները կառավարության ներկայացուցչին են փոխանցել խորհրդանշական նվեր՝ բջջային հեռախոս։ Նրանք հայտարարել են, որ այս հեռախոսով խոսելիս հնարավոր չէ տարածել կեղծ տեղեկատվություն, ատելության քարոզչություն, պառակտում մտցնել, թշնամանք սերմանել ընտանիքների միջև։ Այս հեռախոսը կարգելափակի բոլոր այդ երևույթները:
Սամվել Կարապետյանին սատարող ակցիաներ և ֆլեշմոբեր են անցկացվում նաև մայրաքաղաքի տարբեր հատվածներում: Բողոքի ակցիայի մասնակիցները երթ են սկսել Երևանով։
Սամվել Կարապետյանի նկատմամբ քրեական հետապնդման մասին
Սամվել Կարապետյանը կալանքի տակ է գտնվում 2025 թվականի հունիսի 18-ից դեկտեմբերի 30-ը, ինչից հետո խափանման միջոցը փոխվել է տնային կալանքի։
Նրան մեղսագրվում են իշխանությունը զավթելու հրապարակային կոչեր։ Քրեական գործի առիթ են հանդիսացել Կարապետյանի հայտարարությունները՝ արված Ամենայն Հայոց Կաթողիկոս Գարեգին Բ-ի հետ հանդիպումից հետո։ Այն ժամանակ նա հայտարարել էր, որ միշտ սատարել է Հայ Առաքելական եկեղեցուն ու հայ ժողովրդին և հավելել էր, որ քաղաքական գործիչների ձախողման դեպքում «պատրաստ է իր ձևով մասնակցել տեղի ունեցողին»։
Ավելի ուշ Կարապետյանին առաջադրվել են նաև տնտեսական բնույթի մեղադրանքներ՝ առանձնապես խոշոր չափերով հարկեր չվճարելու և փողերի լվացման համար։
Կարապետյանը չի ընդունում իրեն առաջադրված մեղադրանքները։