Այն միջոցին, երբ Հըզպալլա շեշտակիօրէն ընդարձակեց Իսրայէլի դէմ իր յարձակումները` հասնելով մինչեւ Թել Աւիւի յատկապէս արհեստագիտական եւ ելեկտրոնային կառոյցները, Իսրայէլ փոխադարձաբար թիրախաւորեց հարաւային Լիբանանի եւ Պէյրութի Հարաւային արուարձաններու զանազան շրջանները` շարունակելով իր ազդարարութիւնները շրջանի բնակիչներուն հեռանալու իրենց բնակած վայրերէն: Հարաւային Լիբանանի մէջ իսրայէլեան հայեացքները հիմնականին մէջ ուղղուած են լիբանանեան արեւելեան լեռնաշղթային ուղղութեամբ: Աւելի՛ն, անոր հարուածները սկսան կեդրոնանալ յատկապէս Հըզպալլայի կառոյցներու ենթակառուցային սարքերուն վրայ: Այս ծիրին մէջ երէկ աւելի քան տասը յարձակումներով թիրախաւորուեցան Հըզպալլայի հովանաւորած «Քարտ Հասան» հաստատութեան տարբեր մասնաճիւղերու կեդրոնները Պէյրութի Հարաւային արուարձաններուն մէջ:
Հայր Փիեռ Ռահի Զոհուեցաւ Քլէյհայի Մէջ
Միւս կողմէ, Իսրայէլ վտանգաւոր հետեւանքներ առթող քայլով մը երէկ ազդարարեց հարաւային Քլէյհա աւանը եւ աւելի ուշ հարուածեց զայն` պատրուակելով, թէ Հըզպալլայի զինեալներ նկատուած են շրջանին մէջ: Դէպքի ընթացքին վիրաւորուեցաւ աւանի հոգեւոր հովիւը` հայր Փիեռ Ռահի, որ աւելի ուշ մահացաւ ստացած վէրքերուն հետեւանքով: Նշենք, որ Քլէյհա մեծամասնութեամբ քրիստոնեայ բնակչութեամբ աւանը եւ մերձակայ շրջաններ վերջերս յայտարարած էին, թէ կը մերժեն ենթարկուիլ Իսրայէլի տարհանման հրահանգներուն եւ թէ կառչած կը մնան իրենց հողերուն: Հոգեւոր հօր նահատակութեան լուրը ստանալով շրջանի բնակիչները փողոց իջան դատապարտելով եւ պետութենէն պաշտպանութիւն պահանջելով:
Նոյն ծիրին մէջ հարաւային Լիբանանի մէջ տեղակայուած ՖԻՆԻՒԼ-ի մէկ ջոկատի պատասխանատուն յայտնեց, որ պիտի զօրակցի ու հովանաւորէ Ալմա Շաապի բնակչութեան, ապահով ձեւով հեռանալու համար շրջանէն` իսրայէլեան յաճախակիօրէն կրկնուող ազդարարութեանց լոյսին տակ:
Ուշագրաւ է, որ իսրայէլեան ազդարարութիւնները կ՛ընթանան ռազմավարական կարեւորութիւն ներկայացնող շրջաններու ուղղութեամբ: Նորագոյն ազդարարութիւնը հարաւային սահմանի Նաքուրա շրջանի մերձակայքին ուղղուած էր:
Իսրայէլ երէկ երեկոյեան հարաւային Լիբանանի մէջ շարունակելով իր յարձակումները ազդարարեց նաեւ Սայտայի Անսարիէ շրջանի բնակիչները` անյապաղ հեռանալու Անսարիէէն եւ մերձակայքի շրջաններէն:
Ըստ «Հիումըն Ռայց Ուոչ»-ի
Իսրայէլ Ֆոսֆորային Հրթիռ Կը Գործածէ
Միւս կողմէ, իմացուեցաւ, թէ իսրայէլեան ուժեր իրենց յարձակումներուն ընթացքին արգիլուած սպիտակ ֆոսֆորի հրթիռներ կ՛օգտագործեն: Այս մասին Մարդկային իրաւանց «Հիումըն Ռայց Ուոչ» կազմակերպութիւնը յիշեցուց, թէ Իսրայէլ 3 մարտ 2026-ին իր գործած յարձակումներու ընթացքին հարաւային Եոհմոր շրջանին մէջ սպիտակ ֆոսֆորի հրթիռներ գործածած է` նշելով, որ բնակելի շրջաններու ուղղութեամբ նման հրթիռներու գործածութիւնը արգիլուած է միջազգային համապատասխան օրէնքներով: