Միացյալ Նահանգների նախագահ Դոնալդ Թրամփը դեռ չի որոշել՝ իմաստ ունի՛ արդյոք սկսել ցամաքային ռազմական գործողություններ Իրանում։
«Մենք այդ հարցի վերաբերյալ դեռ որոշում չենք ընդունել։ Մենք դրանից դեռ շատ հեռու ենք», – ասել է Թրամփը New York Post-ին տված հարցազրույցում։
Պարբերականը նշում է, որ այսպես Միացյալ Նահանգների նախագահը մեկնաբանել է այն տեղեկությունները, ըստ որոնց՝ ԱՄՆ վարչակազմում քննարկում են ամերիկացի զինվորականների Իրան ուղարկելու և Սպահանում պահվող միջուկային նյութերը վերցնելու հարցը։
Թրամփը նաև հայտարարել է, թե գոհ չէ, որ Իրանի նոր գերագույն առաջնորդ է ընտրվել սպանված Ալի Խամենեիի որդին՝ Մոջթաբա Խամենեին, սակայն չի բացահայտել՝ ինչ քայլեր է մտադիր ձեռնարկել հետագայում։
«Ես չեմ պատրաստվում ձեզ ասել», – հայտարարել է ԱՄՆ նախագահը։
Ավելի վաղ Թրամփը հայտարարել էր, որ ցանկանում է անձամբ ազդել Իրանի նոր գերագույն առաջնորդի նշանակման գործընթացի վրա, ընդգծելով, թե չի համաձայնի այնպիսի առաջնորդի հետ, որը կշարունակի Խամենեիի քաղաքական գիծը։