Անցեալ շաբաթ Լիբանանի եւ Սուրիոյ միջեւ սահմաններուն վրայ փախստականներու եւ օրինազանց տարրերու «զսպումի ճիգերը» որոշ մտահոգութիւններ ստեղծած էին լիբանանեան կարգ մը շրջանակներու մօտ` սուրիական ուժերու հաւանական թափանցումի եւ կարգ մը զինեալ խմբաւորումներու թիրախաւորման հաւանականութեան գծով:
Այս մթնոլորտի լոյսին տակ Սուրիոյ նախագահ Ահմետ Շարեհ անցեալ շաբաթավերջին հեռաձայնային հաղորդակցութիւն ունեցաւ Լիբանանի վարչապետ Նաուաֆ Սալամի հետ` անոր ներկայացնելով սուրիական ուժերու տեղակայումը լիբանանեան-սուրիական սահմանի երկայնքին եւ այդ քայլի իսկական դրդապատճառները:
Սուրիոյ նախագահը յստակացուց, թէ նման դասաւորում կատարուած է նաեւ Սուրիոյ եւ Իրաքի միջեւ սահմաններու երկայնքին, եւ այս ` պաշտպանելու համար երկիրը օրինազանց եւ փախստական տարրերու արկածախնդրական քայլերէն ու դէպի Սուրիա թափանցումէն: Նախագահ Շարեհ իր զօրակցութիւնն ու համերաշխութիւնը յայտնեց Լիբանանին` անոր դիմագրաւած այս տագնապալի օրերուն: Ան շեշտեց Լիբանանի եւ Սուրիոյ միջեւ ճիգերու համակարգումի կարեւորութիւնը:
Իր կարգին, Լիբանանի վարչապետ Նաուաֆ Սալամ շնորհակալութիւն յայտնեց Սուրիոյ նախագահին, իր կարգին շեշտելով Սուրիոյ եւ Լիբանանի միջեւ համախոհութեան եւ խորհրդակցութեան կարեւորութիւնը: