«Բարեգործության արգելքը սկսեց գործել ընտրությունների օրվա նշանակման պահից սկսած: Արդեն ահազանգեր են հնչում քաղաքական դաշտում: Օրինակ՝ խոսում են վարձավճարների վճարման մասին, դրան զուգահեռ վարչապետի տիկնոջ հիմնադրամը անգլերենի դասընթացների խոստումներ է տալիս, բայց Հակակոռուպցիոն կոմիտեից արձագանքներ չկան: Երբ վարչապետի տիկինն ընտրական պրոցեսի էս ընթացքում ինչ-որ խոստումներ է տալիս հիմնադրամի շրջանակներում, իրավական գնահատական կարո՞ղ է լինել»,- ճեպազրույցի ժամանակ հարց ուղղվեց Հակակոռուպցիոն կոմիտեի նախագահ Արթուր Նահապետյանին: Վերջինս պատասխանեց. «Այս պահին կխուսափեմ կոնկրետ դեպքի մասով իրավական գնահատական տալ, որպեսզի հետագայում նաև չկանխորոշվի իմ ասածը իրավական ելքով, բայց մենք Քրեական օրենսգրքում ունենք 221 հոդված՝ բարեգործության արգելքը խախտելու: Այդ հոդվածում հստակ սահմանված են թե՛ եղանակները, թե՛ սուբյեկտները՝ ովքեր են այդ հոդածով հանցակազմի սուբյեկտ: Կոնկրետ ձեր ասած դեպքով մենք հաղորդում չունենք»: