Վրաստանի կառավարությունն արգելել է մշտական կացության կարգավիճակ չունեցող օտարերկրացիներին աշխատել որպես առաքիչներ, զբոսավարներ և տաքսու վարորդներ, ըստ տեղական Georgia Online պորտալի՝ ասվում է վարչապետ Իրակլի Կոբախիձեի ստորագրած հրամանագրում։։
Հրամանագիրը հաստատում է օտարերկրյա քաղաքացիներին աշխատանքային իրավունք տրամադրելու կանոնները և սահմանում է տարեկան քվոտաներ մի շարք մասնագիտությունների համար՝ այսպիսով սահմանափակելով օտարերկրացիների համար հնարավորությունները։ Առաքիչների, ուղեկցորդների և վարորդների համար սահմանված քվոտաները զրոյական են։
Նոր կանոնները ուժի մեջ կմտնեն 2026 թվականի մարտի 1-ից։
Վրաստանի վարչապետը շեշտել է, որ նոր կանոնները երկրի քաղաքացիների շահերի պաշտպանության համար են: «Մենք սահմանել ենք այն ոլորտները, որտեղ հնարավոր է օտարերկրացիների զբաղվածությունը, և որտեղ նպատակահարմար չէ: Սա կարևոր է՝ մեր քաղաքացիների համար զբաղվածության հարցում մեծ մրցակցություն չստեղծելու համար: Հատուկ դեպքերում սահմանվել են զրոյական քվոտաներ, ինչը նշանակում է, որ սահմանվել են ոլորտներ, որտեղ ոչ ոք չի կարող մրցակցել մեր քաղաքացիների հետ», — ասել է Կոբախիձեն։
Այս տարվա մարտի 1-ից Վրաստանում ուժի մեջ կմտնեն նաև միգրանտների զբաղվածությանը վերաբերող մի շարք այլ կանոնակարգեր: Վրաստանում աշխատանքային պայմանագիր կնքելու համար անհրաժեշտ կլինի աշխատանքային վիզա (D1) կամ ժամանակավոր կացության կարգավիճակ: Վրաստանում որպես անհատ ձեռնարկատերեր (ԱՁ) գրանցված օտարերկրացիները, իրենց հերթին, պարտավոր կլինեն ստանալ աշխատանքային թույլտվություն, նույնիսկ եթե հեռավար ծառայություններ են մատուցում: Այս վերաբերում է, օրինակ, ՏՏ մասնագետներին, ինչպես նաև հեռավար աշխատող այլ անձանց։