Վարչական բարգաւաճման հարցերու պետական նախարար Ֆատի Մաքքի մեկնարկը յայտարարեց «Լիբանանի մէջ իրաւարարութեան ամրապնդման» ծրագիրին, որ կը գործադրուի իտալական կառավարութեան կողմէ ֆինանսաւորուող` Տնտեսական գործակցութեան ու բարգաւաճման կազմակերպութեան Միջին Արեւելքի եւ Հիւսիսային Ափրիկէի շրջանի իրաւարարութեան ծրագիրին միջոցով:
Երիտասարդութեան եւ մարմնակրթութեան նախարար դոկտ. Նորա Պայրագտարեան հանդիսութեան ընթացքին խօսք մը արտասանելով յայտնեց. «Իրաւարարութեան բարեկարգումը նախապայման է տնտեսական դիմադրողականութեան ամրապնդման, ընկերային համախմբուածութեան եւ ժողովրդավարական հաւաստիութեան ամրապնդման համար»` աւելցնելով. «Ներառական կառավարումը հիմնուած է որոշումներու կայացման թափանցիկութեան, քաղաքացիներու կարիքներուն արձագանգելու եւ քաղաքականութեան մշակման լայն մասնակցութեան վրայ»:
«Նախարարութեան մօտեցումը հիմնուած է երիտասարդները իբրեւ քաղաքականութեան մշակման գործընկեր դիտարկելու վրայ, եւ ոչ թէ պարզապէս անոնց շահառուներ` որդեգրմանը միջոցով կազմակերպուած մասնակցային մեքանիզմներու, որոնք կը ներառեն համալսարանական ուսանողներու եւ տարբեր շրջաններու երիտասարդներու համար խորհրդակցութիւններ` ապահովելու համար, որ երիտասարդութեան ազգային ռազմավարութիւնը արտացոլէ անոնց իրական առաջնահերթութիւնները, մարտահրաւէրներն ու ձգտումները», նշեց նախարար Պայրագտարեան:
«Այս հոլովոյթը կ՛ամրապնդէ վստահութիւնը եւ կը հաստատէ մասնակցային քաղաքականութեան մշակման մշակոյթ, ինչպէս նաեւ հիմք կը դնէ երիտասարդներու ապրած իրականութենէն բխող ազգային շրջանակի համար», նշեց Պայրագտարեան` ընդգծելով. «Համալիր կառավարումը կը պահանջէ միջոլորտային համագործակցութիւն կրթութեան, աշխատանքի, թուային վերափոխման, ընկերային պաշտպանութեան եւ նորարարութեան հարցերով զբաղող նախարարութիւններուն միջեւ` Նաուաֆ Սալամի գլխաւորած կառավարութեան հորիզոնական կառավարման ծիրին մէջ»` հաստատելով «նախարարութեան յանձնառութիւնը հանրային քաղաքականութեան հիմքին մէջ դնելու թափանցիկութեան, մասնակցութեան եւ ներառականութեան սկզբունքները»: