ՀՀ քննչական կոմիտեի նախագահ Արթուր Պողոսյանը փետրվարի 11-ին ընդունել է Մեծ Բրիտանիայի դեսպան Ալեքսանդրա Քոուլին։ Հանդիպման ընթացքում քննարկվել են միջազգային իրավական համագործակցությունը, քրեական վարույթների ընթացքի ապահովումը, ինչպես նաև կիբեռանվտանգության ոլորտում փորձի փոխանակման և քննիչների մասնագիտական կարողությունների զարգացման հնարավորությունները։
Արթուր Պողոսյանը հանդիպման ընթացքում անդրադարձել է միջազգային իրավական համագործակցության շրջանակում ուղարկվող հարցումներին՝ ընդգծելով, որ դրանց ամբողջ ծավալով կատարման արդյունքում ստացված պատասխաններով լուծվել է համապատասխան քրեական վարույթների ընթացքը:
Դեսպանը հայտնել է իր պատրաստակամությունը՝ օժանդակելու քննիչների մասնագիտական կարողությունների շարունակական զարգացմանը:
Կողմերը քննարկել են համագործակցության ընթացքում փորձագետների ներգրավման անհրաժեշտությունը, որոնց շնորհիվ կգույքագրվեն կիբեռանվտանգության ոլորտում փորձի փոխանակման առաջնահերթությունները։
ՀՀ ՔԿ