Քաղաքականություն
02.02.2026 | 15:10
Իրանի արտաքին գործերի նախարարության խոսնակ Էսմայիլ Բաղային հայտարարել է, որ Իրանն ուսումնասիրում է ԱՄՆ-ի հետ լարվածությունը կարգավորելու տարբեր դիվանագիտական գործընթացների մանրամասները՝ հավելելով, որ Թեհրանը հույս ունի արդյունքների հասնել առաջիկա օրերին, գրում է Reuters-ը:
Իրանի մոտակայքում ԱՄՆ կողմից ռազմածովային ուժերի ներկայության կուտակման ֆոնին՝ ԱՄՆ նախագահ Դոնալդ Թրամփն անցյալ շաբաթ լրագրողներին ասել էր, որ Իրանը «լուրջ բանակցություններ է վարում» Վաշինգտոնի հետ՝ այն բանից հետո, երբ Իրանի անվտանգության բարձրաստիճան պաշտոնյա Ալի Լարիջանին X-ում ասել էր, որ բանակցությունների նախապատրաստական աշխատանքներ են ընթանում։
«Տարածաշրջանային երկրները միջնորդ են փոխանակված հաղորդագրությունների համար։ Փոխանակվել են տարբեր կետեր, և մենք ներկայում ուսումնասիրում ենք յուրաքանչյուր դիվանագիտական գործընթացի մանրամասները, որոնք, հուսով ենք, արդյունքներ կբերեն առաջիկա օրերին։ Սա վերաբերում է [բանակցությունների] գործընթացին և շրջանակին»,- ասել է Բաղային։
Թարգմանությունը՝ Էմմա Չոբանյանի