Իրանի մէջ զանգուածային բողոքի ցոյցերու ճնշման հետեւանքով զոհերու թիւի կտրուկ աճէն ետք, Եւրոպական յանձնաժողովի նախագահ Ուրսուլա Ֆոն Տեր Լեյեն յայտարարած է, որ Պրիւքսել նոր պատժամիջոցներ պիտի առաջարկէ Իրանի նկատմամբ:
«Իրանի մէջ զոհերու աճող թիւը սարսափեցնող է: Ես միանշանակ կը դատապարտեմ ուժի կիրարկումը եւ ազատութեան շարունակական սահմանափակումը», գրած է Եւրոպական յանձնաժողովի նախագահը` աւելցնելով. «Բռնաճնշումներու համար պատասխանատուներուն նկատմամբ լրացուցիչ պատժամիջոցները արագօրէն պիտի առաջարկուին»:
Եւրոպական Միութեան արտաքին յարաբերութիւններու եւ անվտանգութեան հարցերով բարձր ներկայացուցիչ Քայա Քալլաս իր կարգին աւելի կանուխ յայտարարած էր, որ պատրաստ է նոր պատժամիջոցներ առաջարկելու Թեհրանի նկատմամբ` ի պատասխան ցուցարարներուն նկատմամբ կիրարկուած բռնութիւններու:
«Եւրոպական Միութիւնը արդէն իսկ լայնածաւալ պատժամիջոցներ կիրարկած է Իրանի նկատմամբ` մարդու իրաւունքներու խախտումներու, հիւլէական զէնքի տարածման գործունէութեան եւ Ուքրանիոյ մէջ Ռուսիոյ կողմէ տարուող պատերազմին Թեհրանի աջակցութեան համար», գերմանական «Տի Վելթ» թերթին տուած հարցազրոյցին մէջ ըսած է Քայա Քալլաս` ընդգծելով. «Ես պատրաստ եմ առաջարկելու լրացուցիչ պատժամիջոցներ` ի պատասխան վարչակարգին կողմէ ցուցարարներուն նկատմամբ դաժան բռնաճնշումներուն»:
Իրանի մէջ հակակառավարական ցոյցերու ժամանակ մօտ երկու հազար մարդ զոհուած է, «Ռոյթըրզ»-ին յայտնած է իրանցի պաշտօնեայ մը:
Երկրին մէջ համացանցն ու հեռաձայնային կապը տակաւին անհասանելի են, թէեւ հաղորդումներ կան, որ երկրէն կարելի եղած է որոշ միջազգային հեռաձայնային հաղորդակցութիւններ կատարել: Իրաւապաշտպան կազմակերպութիւնները կը զգուշացնեն, որ զոհերու թիւը կրնայ աւելնալ: Այս պահուն Իրանէն լուրեր չեն հասնիր, թէ արդեօք հակակառավարական ցոյցերը կը շարունակուի՞ն: