Հայաստանի վարչապետ Նիկոլ Փաշինեան եւ Ամենայն հայոց Գարեգին Բ. կաթողիկոսի հեռացումը պահանջող10 արքեպիսկոպոսներն ու եպիսկոպոսները նախանցեալ օր «Հայաստանեայց առաքելական սուրբ եկեղեցւոյ բարենորոգման յայտարարութեամբ» հանդէս եկած են:
Ճանապարհային քարտէսի հինգ կէտերով կը նախատեսուի «բարենորոգման օրակարգի հանրահռչակում, Հայաստանեայց առաքելական սուրբ եկեղեցւոյ փաստացի պետի հեռացում (հանգստեան կոչում), սահմանուած կարգով կաթողիկոսական տեղապահի ընտրութիւն, Հայաստանեայց առաքելական սուրբ եկեղեցւոյ կանոնադրութեան ընդունում … սահմանուած կարգով Ամենայն հայոց կաթողիկոսի ընտրութիւն»: Ստորագրուած յայտարարութեան մէջ, փաստօրէն, ներառուած են Փաշինեանի նախապէս կատարած մէկ գրառումին կէտերը:
Մայր աթոռ Ս. Էջմիածինէն երէկ հակադարձեցին, որ «Հայաստանի կառավարութեան ղեկավարի ձեռնարկած գործողութիւնները ուղղակի կ՛ոտնահարեն Հայաստանի Հանրապետութեան Սահմանադրութիւնը, կը խախտեն թէ՛ միջազգայնօրէն, թէ՛ Հայաստանի օրէնսդրութեամբ ամրագրուած եկեղեցւոյ իրաւունքները»:
«Նման հակաեկեղեցական գործընթացներու մէջ եպիսկոպոսներու ներգրաւումը, քահանայից դասի նկատմամբ կիրարուող ճնշումները դատապարտելի են: Եկեղեցւոյ կեանքին առնչուող խնդիրներու քննարկումները կը կատարուին բացառապէս եկեղեցական համապատասխան մարմիններուն մէջ, կանոնական կարգաւորումներու համաձայն: … Եկեղեցւոյ կանոնակարգային հարցերը եւ բարենորոգումը վերապահուած չեն ինքնահռչակ խորհուրդի, այլ` Հայաստանեայց առաքելական սուրբ եկեղեցւոյ նուիրապետութեան` իր բարձրագոյն կառոյցներով», նշուած է Մայր աթոռի տեղեկատուական համակարգի հաղորդագրութեան մէջ` աւելցնելով. «Նման անխոհեմ քայլերը կրնան յանգեցնել հերձուածի` ցաւալի հետեւանքներով»:
Փաշինեանի հակակաթողիկոսական արշաւի եօթը ամիսներուն ընթացքին Գարեգին Բ. կաթողիկոսը հեռանալու ոչ մի ակնարկ կատարած է: Տարեմուտի իր ուղերձին մէջ վեհափառ հայրապետը կոչ ուղղած էր դադրեցնելու «եղբայրադաւութեան քայլերը»: