Լատվիան ավարտել է Ռուսաստանի հետ սահմանային ցանկապատի կառուցումը։ Այս մասին հայտարարել է նախագծի համար պատասխանատու պետական ընկերությունը՝ «Վալստս Նեկուստամիե Իպասումի» (VNI):
Վերջնական փուլում շահագործման է հանձնվել «Իգեյթ»-ի կողմից կառուցված ցանկապատի 72 կմ-ը։
Լատվիա-ռուսական սահմանին ցանկապատի ընդհանուր երկարությունը մոտավորապես 280 կմ է, որը ապահովում է անընդհատ ֆիզիկական պատնեշ բոլոր տեխնիկապես հնարավոր վայրերում։
Նախագծի արժեքը նախկինում գնահատվել էր 146 միլիոն եվրո։
Լատվիայի ներքին գործերի նախարար Ռիհարդս Կոզլովսկիսը նշել է, որ Ռուսաստանի և Բելառուսի հետ սահմաններին ցանկապատի կառուցումը կարևոր ներդրում է ազգային անվտանգության և ԵՄ արտաքին սահմանի պաշտպանության գործում։
Նրա խոսքով՝ սահմանը կշարունակի հագեցած լինել ժամանակակից տեխնոլոգիական հսկողության համակարգերով։
Միաժամանակ շարունակվում են աշխատանքները լրացուցիչ ենթակառուցվածքների, այդ թվում՝ պարեկային ճանապարհների, կամուրջների և ինժեներական կառույցների զարգացման ուղղությամբ։
Այս ամռանը սկսվեց աշխատանքների վերջին փուլը Ռուսաստանի հետ սահմանի ևս 41 կմ հատվածներում, մասնավորապես՝ ճահճոտ տարածքներում: Հիմնական շինարարական աշխատանքների ավարտը նախատեսված է մինչև 2026 թվականի վերջը։
VNĪ-ն նաև համակարգում է Բելառուսի հետ սահմանի նախագծերը: Գրեթե 145 կմ ընդհանուր երկարությամբ գլխավոր ցանկապատի կառուցումն այնտեղ ավարտվել է 2024 թվականի հուլիսին: Առանձին հատվածներում վերջնական ենթակառուցվածքային աշխատանքները նախատեսված է ավարտել մինչև 2026 թվականի գարունը։
Նշվում է նաև, որ Լատվիայի ամբողջ արտաքին ցամաքային սահմանի տեխնոլոգիական հագեցվածությունը նախատեսվում է ավարտել մինչև 2026 թվականի վերջը։