Հայաստանում հիմնադրված, կանանց և նորարարության շուրջ ձևավորված գլոբալ հարթակ FEMINNO-ն պաշտոնապես մեկնարկել է իր գործունեությունը Նյու Յորքում։ Նոր մասնաճյուղի բացումը FEMINNO-ի միջազգային ընդլայնման հերթական փուլն է՝ Հայաստանի և Լոս Անջելեսի հաջող գործունեությունից հետո։
Նյու Յորքում կազմակերպված մեկնարկի միջոցառմանը մասնակցել են տարբեր ոլորտների առաջնորդներ, նորարարներ և գործընկերներ։ Երեկոյի ընթացքում ներկայացվել են FEMINNO-ի անցած ճանապարհը և Նյու Յորքում ձևավորվող նոր գործակցությունները։ Միջոցառման մթնոլորտը համադրել է ժամանակակից տեխնոլոգիական քննարկումները հայկական մշակութային տարրերի հետ՝ ընդգծելով հարթակի կապը հայ համայնքի և մշակույթի հետ։
Միջոցառման ընթացքում ելույթ են ունեցել խոսնակներ առաջնորդության, տեխնոլոգիաների և սոցիալական ազդեցության վերաբերյալ թեմաներով։
Unchained At Last կազմակերպության ՄԱԿ-ի համակարգող և UN NGO CSW/NY-ի նախկին նախագահ Հուրի Գյուդելեքյանը անդրադարձել է հավաքական ազդեցության, քաղաքական ներգրավվածության և կանանց ու աղջիկների իրավունքների պաշտպանության կարևորությանը գլոբալ մակարդակում։
Nasdaq-ի գործադիր պրոդյուսերներից Քրիստինա Այանյանը խոսել է միջազգային ֆինանսական և նորարարական կառույցներում իր փորձի մասին՝ ընդգծելով կանանց դերը համակարգային փոփոխությունների մեջ։
NYU-ի հրավիրյալ դասախոս և Chief Digital & AI Officer Սիրանուշ «Սիրի» Կոստանյանը ներկայացրել է արհեստական և մարդկային բանականությունների փոխհարաբերության զարգացումը՝ շեշտելով, որ արհեստական բանականությունը պետք է ուժեղացնի մարդկային դատողությունն ու ստեղծարարությունը, ոչ թե փոխարինի դրանք։
FEMINNO NYC-ի մեկնարկի շրջանակում ներկայացվել է նաև հարթակի նոր անդամակցության մոդելը, որը նախատեսված է գլոբալ համայնքի երկարաժամկետ աջակցման համար։ Այն ներառում է ուսուցման, առաջնորդության, համագործակցության և տեսանելիության կառուցվածքային հնարավորություններ և դիտարկվում է որպես Նյու Յորքում կայուն ներկայության հիմք։
Երեկոյի ընթացքում ներկայացվել է նաև AI Girls ծրագիրը, որի նպատակն է դեռահաս աղջիկներին ապահովել արհեստական բանականության գրագիտությամբ և ապագային անհրաժեշտ հմտություններով։ Նյու Յորքի մասնաճյուղի բացմամբ ծրագիրը նախատեսում է ընդլայնվել մենթորության, գործընկերությունների և սփյուռքի ներգրավման միջոցով։
FEMINNO-ի հիմնադիր Սեդա Պապոյանը նշել է, որ Նյու Յորքում ներկայությունը կազմակերպության համար ոչ միայն աշխարհագրական ընդլայնում է, այլ նաև պատասխանատվություն՝ ձևավորելու էթիկական և մարդակենտրոն նորարարություն, հատկապես արհեստական բանականության դարաշրջանում։
Այս պահին FEMINNO-ն ունի գործող մասնաճյուղեր Հայաստանում, Լոս Անջելեսում և Նյու Յորքում և շարունակում է իր զարգացումը որպես նորարարության, մշակույթի և սոցիալական ազդեցության վրա հիմնված գլոբալ հարթակ: