Իսրայէլի վարչապետ Պենիամին Նեթանիահու Երուսաղէմի մէջ Իսրայէլի ուժանիւթի նախարար Էլի Քոհենի հետ մամլոյ ասուլիսի ընթացքին յայտարարեց. «Եգիպտոսի հետ Իսրայէլի պատմութեան մէջ կազի մեծագոյն գործարքը կնքեցինք»:
«Եգիպտոսի հետ կազի գործարքին հաւանութիւն տուի մեր անվտանգութեան համար անհրաժեշտ նկատառումները հաշուի առնելէ ետք», նշեց Իսրայէլի վարչապետը:
«Առաջին չորս տարուան ընթացքին կէս միլիառ շեքել պիտի շահինք, որմէ ետք տարեկան եկամուտը կը սկսի շուրջ 6 միլիառ շեքելի բարձրանալ», աւելցուց ան:
Իսրայէլի ուժանիւթի նախարարը իր կարգին ըսաւ. «Եգիպտոսի հետ համաձայնութիւնը դժուար բանակցութիւններէ ետք գոյացաւ»:
Միւս կողմէ, իսրայէլեան լրատուամիջոցներ հաղորդեցին. «Եգիպտոսի հետ կազի գործարքի յայտարարութենէն ետք, Իսրայէլ ներկայիս Սուրիոյ հետ կազի համաձայնութեան շուրջ կը բանակցի»: