Հասարակածային Գվինեան պատրաստ է հյուրընկալել Ռուսաստան-Աֆրիկա հաջորդ գագաթնաժողովը, որը տեղի կունենա 2026 թվականին: Այս մասին հայտարարել է Հասարակածային Գվինեայի արտաքին գործերի, միջազգային համագործակցության և սփյուռքի հարցերով նախարար Սիմեոն Օյոնո Էսոնո Անգուեն՝ ելույթ ունենալով Ռուսաստան-Աֆրիկա ֆորումի նախարարական համաժողովի լիագումար նիստում:
«Մենք լիովին պատրաստ ենք շարունակել մեր համագործակցությունը Ռուսաստանի Դաշնության հետ և պատրաստ ենք 2026 թվականին մեր երկրում անցկացնել Ռուսաստան-Աֆրիկա հաջորդ գագաթնաժողովը»,-ասել է նա։
Նախարարի խոսքով՝ միջոցառումը կամրապնդի Ռուսաստանի և Աֆրիկայի միջև հարաբերությունները բոլոր ոլորտներում և կնպաստի զարգացման համագործակցությանը։
Աֆրիկան Ռուսաստանին համարում է մշտական ռազմավարական գործընկեր և հատկապես հետաքրքրված է Ռուսաստանի հետ համագործակցության զարգացմամբ այնպիսի ոլորտներում, ինչպիսիք են էներգետիկան, գյուղատնտեսությունը և կրթությունը, ընդգծել է Սիմեոն Օյոնո Էսոնո Անգուեն։