Թրամփի վարչակազմը ստեղծում է հինգ երկրներից բաղկացած դաշինք՝ հանքանյութերի արդյունահանման, արհեստական բանականության և տեխնոլոգիաների ոլորտում Չինաստանի գերիշխանությանը հակազդելու համար։ Այս մասին հաղորդում է Politico-ն:
Հրապարակման համաձայն՝ դեկտեմբերի 12-ին կստորագրվի հռչակագիր, որը կմիավորի Սինգապուրը, Ավստրալիան, Ճապոնիան, Հարավային Կորեան և Իսրայելը։ Միասին նրանք կաշխատեն կարևորագույն հանքային ռեսուրսների պակասը լրացնելու ուղղությամբ։ Թրամփի վարչակազմը նաև մտադիր է ընդլայնել դաշինքը՝ ներառելով հանքային, տեխնոլոգիական և արտադրական ռեսուրսներ ունեցող այլ երկրներ։
Հռչակագրի ընդունումը կնվազեցնի կարևորագույն հանքային ռեսուրսներում չինական ներդրումները և կհարթի համատեղ հետազոտությունների և ենթակառուցվածքների զարգացման ճանապարհը, հաղորդում է Politico-ն՝ հղում անելով տնտեսական հարցերով պետքարտուղարի տեղակալ Ջեյքոբ Հելբերգին։
Հռչակագիրը նաև արտացոլում է «ԱՄՆ-ի մտահոգությունները Չինաստանի կողմից արհեստական բանականության և քվանտային հաշվարկների ոլորտում կատարված հսկայական ներդրումների վերաբերյալ, որոնք կարող են նրան մրցակցային առավելություն տալ 21-րդ դարի տնտեսությունում»,- նշել է նա։